УФ-йы Федерацийы Советы цы цæлхæмбырд уыд, уый архайджытæ се ’ргом аздæхтой бæстæйы цæрæнуатон-коммуналон хæдзарады комплексы тыхстаг фарстатæм.
Ныхасы архайдта уæрæсейаг парламенты уæллаг палатæйы уæнг Цæгат Ирыстонæй Виталий Назаренко дæр.
Сенатортæ æмæ профилон федералон ведомствæты минæвæрттæ куыд фæбæрæг кодтой, афтæмæй амынд къабазы лыггæнинаг фарстатæ зындгонд сты: коммуналон хызæгты зынгæ хайы цауд уавæр, куысты мызды бæрц, цæрæнуатон инфраструктурæйы объектты цалцæг æмæ модернизаци æмæ афтæ дарддæр. Специалистты хъуыдымæ гæсгæ, сæрмагонд ныхас æмæ цæстдарды аккаг у цæрæнуатон-коммуналон комплексы ифтонгдзинад хъæугæ кусджытæй. Эксперттæ куыд банымадтой, афтæмæй къабазы нæ фаг кæны 100 мин кусæгæй фылдæр. Уыдоны нымæцы – инженертæ, слесыртæ, сантехниктæ, электриктæ, хъармгæнæнты оператортæ…
«Цæрæнуатон-коммуналон хæдзарад у бæстæйы национ экономикæйы ахсджиагдæр цæгтæй иу. Ацы къабазы чи кусы, уыцы специалистты профессион дæсныдзинадæй комкоммæ аразгæ у цæрæнуатон-коммуналон комплексы æнæкъуыхцы архайд, лæггæдты хæрзхъæддзинад. Уыцы æууæлтæ зæрдыл даргæйæ, къæпхæнгай куыст цæуы лыггæнинаг фарстатыл», – йæ раныхасы бафиппайдта Виталий Назаренко.
Цæлхæмбырды архай-джытæ цы фæндæттæ бахастой, уыдоны бындурыл фидаргонд æрцæудзысты дарддæры куысты пълантæ, сæрмагонд амынддзинæдтæ арвитдзысты профилон ведомствæтæм.
ÆЛБОРТЫ Зæлинæ,
УФ-йы сенаторы
æххуысгæнæг
