Ирыстоны театралон аивад æмæ национ культурæйыл æрцыд, баххæстгæнæн кæмæн нал уыдзæн, ахæм уæззау зиан.
Йæ цардæй ахицæн Тæбæхсæуты Балойы номыл Ирон академион театры актерты хистæр фæлтæры минæвæрттæн сæ курдиатджындæр минæвæрттæй иу, бирæвæрсыг ирд æмæ хæдбындур сценикон гæнæнты хицау Уæрæсейы Федерацийы сгуыхт æмæ Республикæ Цæгат Ирыстон-Аланийы адæмон артист Суанты Семены фырт Хъазыбег.
Суанты Хъазыбег райгуырд 1946 азы 17 майы Цæгат Ирыстоны АССР-йы горæт Назраны. Йе сценикон сфæлдыстадон фæндаг райдыдта 1970 азы, æнтыстджынæй каст фæци Мæскуыйы Луначарскийы номыл Театралон институт (ГИТИС) æмæ, йæ райгуырæн Ирыстонмæ куы ссыд, уæдæй йæ фæс-
таг сулæфты онг зæрдиаг æмæ биноныг сфæлдыстадон куыст фæкодта Тæбæхсæуты Балойы номыл Ирон академион театры сценæйы. Ирон, уырыссаг, дунеон драматургийы уацмыстæм гæсгæ, æвæрд спектакльты йын цы трагедион, комедион сурæттæ саразын бантыст, уыдонæй алкæцыдæр бынат ссардта курдиатджын актеры сфæлдыстадон азфысты.
Суанты Хъазыбег йæхи базонын кодта, куыд нырыккон ирон адæмон зарæггæнæг дæр. Ирыстоны цы нæ хъæу æмæ горæт бабæрæг кодта йæ концерттимæ, ахæм нал баззад. Тынг сæрæнæй архайдта театр æмæ республикæйы æхсæнадон царды, уыдис Цæгат Ирыстоны паддзахадон университеты актерты хайады факультеты фæлварæнтæ исæг къамисы сæрдар. Бирæ азты дæргъы уыд театры Аивадон советы, РЦИ-Аланийы театралон архайджыты цæдисы уæнг.
Куыд сценæйы мастер, афтæ Суанты Хъазыбегæн йæ ирд фæлгонц, йе ‘цæг курдиат скодтой ном, зыдтой йæ Ирыстоны театралон аивад æмæ Уæрæсейы æппæт культурон тыгъдады. Курдиатджын актер æмæ зарæггæнæджы бирæвæрсыг сфæлдыстадон гæнæнтæн нæ бæстæ æмæ Цæгат Ирыстоны разамынд скодта аккаг аргъ.
Лæвæрд ын æрцыд Цæгат Ирыстоны АССР-йы сгуыхт артист æмæ Цæгат Ирыстон-Аланийы адæмон артисты, Уæрæсейы Федерацийы сгуыхт артисты кадджын нæмттæ, Кады нысан «Культурæйы æнтыстдзинæдты тыххæй», майдан «Ирыстоны намысæн».
Курдиатджын актер, уæздан, зæрдæхæлар адæймаг Суанты Семены фырт Хъазыбеджы ном баззайдзæн нæ зæрдæты, Цæгат Ирыстоны театралон аивады историйы.
С. Меняйло.,
Тускъаты Т.,
Дзанайты Б.,
Фидараты С.
