Ирон культурæйыл æрцыд стыр зиан. Йæ царды 88-æм азы ахицæн ирон телеуынынады кад, цæхæркалгæ телеамонæг, Цæгат Ирыстоны адæмон артист, Хуссар Ирыстоны сгуыхт артист Дудиаты Дзамбулаты фырт Владимир.
Дудиаты В. райгуырд 1937 азы 8 апрелы Дзæуджыхъæуы. Йæ фæллойадон фæндаг райдыдта хистæр пионервожатыйæ, уый фæстæ уыд Цæгат Ирыстоны паддзахадон драмон театры сценæйы кусæг. Советон Æфсады баслужбæ кæнгæйæ, бацыд Цæгат Ирыстоны медицинон училищæмæ. Каст æй фæуыны фæстæ куыста фелшырæй тагъд медицинон æххуысы станцæйы.
1963 азы Дудиаты Владимир архайдта Цæгат Ирыстоны телеуынынады дикторы бынат бацахсыны конкурсы. Æрыгон, курдиатджын æмæ зæрдæмæдзæугæ лæппу-
йыл сæ цæст æрæвæрдтой æмæ йæ диктор-практикантæй райстой. Уæдæй Дудиаты Дзамбулаты фырт Владимирæн райдыдта йæ дæргъвæтин, стыр æмæ цæхæркалгæ фæндаг телеамонæджы дæсныйады уæлхохы цъупмæ.
Советон телеуынынады номдзыд телеамонджытæ В. Балашов,
А. Шилова, В. Леонтьевайы ахуырдзау уæвгæйæ, Валодя национ телеуынынады раргом кодта йæ дикторон æмæ актеры курдиат.
Дудиаты Валодя ирон æмæ уырыссаг æвзæгтыл æнтыстджынæй амыдта равдыстытæ.
Дæсгай азты кусгæйæ, Валодя ссис ирон телеуынынады удæгас кад, бæрзонд дæсныйады дæнцæг, йæ ахаст ирон æвзагмæ æвдыста арæхстгай. Ирд курдиаты, размæ хонæг тыхы хицау, тынг зæрдæмæдзæугæ адæймаг уæвгæйæ, Дудиайы-фырт æвдыста фæллоймæ уарзондзинад, цы хъуыддаг равзæрста, ууыл уыд æнувыд. Цæгат Ирыстоны алы хæдзары дæр дикторыл æмбæлдысты цингæнгæйæ, æцæг уарзтæй йæ уарзтой, кад ын кодтой, æууæндыдысты йыл. Æрыгон диктортæн Дудиаты Валодя уыд дæнцæг, телеуынынады кусын чи райдыдта, уыдонæн фæзминаг.
Йæ дæсныйады æнтыстытæ æмæ ирон телеуынынад æмæ национ культурæйы рæзтмæ стыр бавæрæны тыххæй Дудиаты Валодя хорзæхджынгонд æрцыд бирæ паддзахадон хæрзиуджытæ æмæ кады нæмттæй. Ссис ЦИАССР-йы сгуыхт артист, РЦИ-Аланийы адæмон артист, Хуссар Ирыстоны сгуыхт артист. 2007 азы Дудиаты Валодя райста «Ирыстоны намысæн»-ы майдан, 2021 азы – 2-аг къæпхæны «Фыдыбæстæйы раз сгуыхтдзинæдты тыххæй»
орден.
Ирон телеуынынады раззагдæр минæвар, ирд æмæ æвæджиауы миниуджыты хицау, зæрдæхæлар æмæ баххуысмæ цæттæ адæймаг Дудиаты Дзамбулаты фырт Владимиры рухс сурæт баззайдзæн йе ‘мкусджыты, йе ‘мбæлтты, телевизормæ кæсæг адæмы зæрдæты.
С. Меняйло.,
Тускъаты Т.,
Дзанайты Б.
