Дагестайнаг горæт Хасавюрты 1-3 ноябры цыдысты Теждин Гусейновы номарæн Æппæтуæрæсеон турниры ерыстæ фæсивæды (21 азы онг) ‘хсæн.
Уæрæсейы богæлттæй уæлдай, турниры архайдтой фæсарæйнаг фондз бæстæйы минæвæрттæ дæр.
Ирыстонæй турниры чи архайдта, уыцы богæлттæн бантыст цыппар хæрзи-
уæджы рамбулын. Уыдонæй иу у сыгъзæрин, æртæ та – æвзист майдантæ.
Сыгъзæрин майданæй хорзæхджын ссис тренер Хъоцыты Виталийы хъомылгæнинаг Гаглойты Инал. Нæ нудæсаздзыд богал ерыс кодта 125 кг онг уæзы æмæ æнæгуырысхойæ фæуæлахиз йæ цыппар ныхмæлæууæгыл. Кæронбæттæны йæ ныхмæлæууæг уыдис дагестайнаг богал Шахбан Алиев. Уый тынг фæндыдис фæуæлахиз уæвын æмæ йе ’ппæт тыхтæй архайдта Иналы размæцыд йæхи пайдайæн фæцаразыныл, фæлæ йын нæ бантыст. Инал фæуæлахиз 4:0 хыгъдæй æмæ бацахста фыццаг бынат.
Фæйнæ цыппар ныхмæлæууæгыл фæуæлахиз сты Фрайты Руслан,
Хуыбызты Тамерлан æмæ Гæбуты Сослан дæр, фæлæ, кæронбæттæнмæ тырнгæйæ, фæйнæ иу хатты кæй фæхæрд сты, уый сын фадат нал ратта сыгъзæрин майдан рамбулыныл ерыс кæнынæн. Гæнæн ма сын уыди æртыккаг бынæттæ рамбулыныл атох кæнынæн, æмæ сын уый бантыст.
Хуыбызты Тамерлан (йæ тренер – Æлборты Будзи) 79 кг онг уæзы æртыккаг бынат рамбулыныл фембæлд нæ иннæ богал Абайты Георгиимæ. Сæ фембæлд ахицæн Тамерланы пайдайæн, æмæ уый ссис бронзæ майданæй хорзæхджын.
92 кг онг уæзы æртыккаг бынат рамбулыныл кæронбæттæны фембæлдысты Гæбуты Сослан (йæ тренер – Олисаты Дзамболат) æмæ дагестайнаг богал Магомед Развановулаев. Сæ фембæлд ахицæн 12:0 хыгъдæй Гæбуты Сосланы пайдайæн, æмæ уый дæр бацахста æртыккаг бынат.
Йæ ныхмæлæууæг Салават Мехтиевæй (Дагестан) зынгæ цæттæдæр уыди Фрайты Руслан дæр. Уæрæсейы сгуыхт тренертæ Æрчъегкаты Тотрадз æмæ Дудайты Эльбрусы хъомылгæнинаг 97 кг онг уæзы 11:0 хыгъдæй фæуæлахиз Салават Мехтиевыл æмæ рацыд æртыккаг бынатмæ.
Турниры 1-аг бынæттæ чи бацахста, уыцы уæрæсейаг богæлттæн лæвæрд цыдис балцæгтæ ацы кары Уæрæсейы фыццаг бынат бацахсыныл ерысты арха-
йынмæ. Ирон богæлттæй балцæг райста Гаглойты Инал. Нæ иннæ богæлттæн ма гæнæн уыдзæн æндæр ерысты ахæм балцæгтæ рамбулынæн.
