«Сæ нæмттæн сын рохгæнæн нæй» – ахæм номарæн акци сарæзтæуыд Дзæуджыхъæуы Нымысы аллейы, йæ службæйы хæстæ æххæстгæнгæйæ чи фæмард, уыцы пъæлицæйæгты цыртдзæвæны раз.
Номарæн мадзал арæзт æрцыд Алагиры районы мидхъуыддæгты хайады цур Ветеранты совет æмæ 3-æм скъолайы ахуыргæнджытæ æмæ ахуырдзауты иумæйаг фæндонæй. Йæ службæйы хæстæ æххæст- гæнгæйæ чи фæмард, уыцы пъæлицæйæгты номарæн бон зæрдыл даргæйæ, мидхъуыддæгты хайады службæгæнджытæ æмæ ветерантæ скъоладзаутимæ бабæрæг кодтой мемориал.
Ветеранты советы сæрдар, пъæлицæйы булкъон отставкæйы Бицъоты Олег, хистæр инспектор, пъæлицæйы капитан Азиаты Мæдинæ, иннæ службæгæнджытæ æмæ скъоладзаутæ дидинджытæ сæвæрдтой цыртдзæвæны раз, иу минут æдзæмæй алæугæйæ, ссардтой æдзард пъæлицæйæгты рухс ном.
Бицъоты Олег скъоладзаутæн бæстон радзырдта, пъæлицæйы кусджыты службæ куыд бæрнон æмæ ахсджиаг у, уый тыххæй. Йæ ныхасмæ гæсгæ, мидхъуыддæгты оргæнты кусджытæ, арæх сæхи æдасдзинадыл нæ хъуыдыгæнгæйæ, хъахъхъæдтой æхсæнадон фæтк æмæ граждæнты сабыр цард. Уымæн ирд æвдисæн – цыртдзæвæны къæйдурыл цы 204 номы ис, уый дæр. Уыдон сæ цард нæ бавгъау кодтой Фыдыбæстæйы æдасдзинад æмæ нывыл царды сæраппонд.
Бицъойы-фырт ахуырдзаутæн бирæ цымыдисаг хабæрттæ радзырдта йæхи службæйы азтæй, рæзгæ фæлтæры минæвæртты фæрстытæн бæстон дзуаппытæ радта.
Номарæн акци саразыныл зæрдиагæй бакуыста Алагиры 3-æм скъолайы директоры уынаффæгæнæг Гусалты Альбинæ дæр.
Зæрдыл дарынæн: йæ службæйы хæстæ æххæстгæнгæйæ чи фæмард, мидхъуыддæгты оргæнты уыцы кусджыты номарæн бон æрвылаз бæрæггонд цæуы 8 ноябры. Уыцы бон æхсæнады минæвæрттæ бабæрæг кæнынц æдзард пъæлицæйæгты мемориалтæ, дидинджытæ сыл сæвæрынц…
Гæззаты Зæринæ,
Мидхъуыддæгты министрады Алагиры районы
хайады инспектор
