Паддзахадон автомобилон инспекцийы кусджытæ иудадзыгон фæткыл аразынц профилактикон мадзæлттæ фæндагон-транспортон фыдбылызтæ ма ‘руадзыны нысанимæ. Ацы бонты та радон ахæм профилактикон рейд инспектортæ сарæзтой республикæйы сæйрагдæр фæндæгтыл.
Рейдон къордты уæнгтæ æрлæууыдысты, фылдæр змæлд кæм ис, уыцы автомобилон фæндæгтыл. Цалдæр сахатмæ фæндагон инспектортæ рабæрæг кодтой иуæй-иу æгъдаухæлдтытæ. Уыимæ, сæрмагонд æргом здæхт цыдис, шофыртæй фæндагон змæлды фæтк гуымиры хуызы чи халы, уыдонæн аккаг ныхкъуырд дæттынмæ. Инспекторты ныхасмæ гæсгæ, ахæм æгъдаухæлдтытæн сæ тæссагдæртæй иу у, хæдтулгæты хицæуттæ сæ ныхмæ цæуæг машинæты уаццагмæ куы разилынц, уый. Цал æмæ цал фыдбылызы æрцыд уый аххосæй – шофыр йæ ныхмæ æрбацæуæг хæдтулгæйæ иуварс фæзилынмæ нал фæцарæхст æмæ дыууæ машинæйы ныхæй-ныхмæ кæрæдзийы сцавтой….
Æппæт уыцы хабæрттæ инспектортæ хæдтулгæты хицæутты зæрдыл æрлæууын кодтой, байуæрстой сын тематикон буклеттæ фæндагон-транспортон фыдбылызты дæнцæгтимæ, ахæм æмæ æндæр барадхæлдтыты тыххæй бæрнондзинады фæдыл æрмæджытимæ. Уыимæ, уыцы бон алыхуызон æгъдаухæлдтыты тыххæй фæндагыл кæй баурæдтой, уыцы шофыртыл суагъæтæ скодтой УФ-йы Административон барадхæлдтыты тыххæй кодексы бындурыл. Ныр уыцы шофыртæ бафиддзысты ивартæ.
«Нæ хæс у æрмæст æгъдаухалджыты рабæрæг кæнын нæ, фæлæ ма æппæтвæрсыг мадзæлтты фæрцы бакусын фæндагон-транспортон фыдбылызты профилактикæйыл. Алкæцы шофыр дæр хъуамæ рох ма кæна, фæндагон змæлды иннæ архайджыты раз бæрнон кæй у æмæ, фидаргонд фæтк æнæмæнг æххæстгæнгæ кæй у, уый. Уыцы æууæлтæ, кæй зæгъын æй хъæуы, комкоммæ ахадынц фæндагон змæлды æппæт архайджыты æдасдзинадыл дæр», – загъд ис Паддзахадон автомобилон инспекцийы цæгатирыстойнаг управленийы хъусынгæнинаджы.
РЦИ-Аланийы Мидхъуыддæгты министрады паддзахадон
автоинспекцийы пресс-службæ
