Сомихы Республикæйы сæйраг горæт Ереваны грекъаг-ромаг æмæ уæгъдибар хъæбысхæстæй цыдысты æфсæддон спортсменты ’хсæн дунейы фыццаг бынат бацахсыныл ерыстæ.
Уæгъдибар хъæбысхæс-тæй Уæрæсейы номæй 86 кг онг уæзы ерысты архайдтой тренер Наниты Зурабы хъомылгæнинаг Багаты Арслан, 65 кг онг уæзы хæцæг Хъызынты Дзамболат (йæ тренер Дзагкойты Алан), 97 кг – Кодзырты Сергей, 125 кг – Хуыгаты Алан.
Багаты Арслан æнæкъуыхцыйæ рахæцыд цыппар ныхмæлæууæгимæ æмæ ссис дунеон æфсæддон спортсменты чемпионаты уæлахиздзау. Кæронбæттæны Арсланы ныхмæлæууæг уыди, Францы æфсады номæй хæцæг дагестайнаг богал Рахим Магомадов æмæ йыл Арслан фæуæлахиз 8:3 хыгъдæй. Æртыккаг бынæттæ бацахстой æмæ бронзæ майдантæй хорзæхджын систы: 65 – Хъызынты Дзамболат, 97 кг – Кодзырты Сергей, 125 кг – Хуыгаты Алан.
Уæрæсейы богæлттæ æдæппæтæй рамбылдтой: 2 сыгъзæрин, 2 æвзист, 5 бронзæ майданы æмæ командæты ’хсæн бацахстой фыццаг бынат.
Баскаты Уырызмæг
