Ацы бонты Цæгат Ирыстоны кусæг балцы уыд Тæрхонадон пъы-
рыстыфты федералон службæйы разамонæг – сæйраг федералон тæрхонадон пъырыстыф Дмитрий Аристов. Федералон чиновникимæ фембæлд РЦИ-Аланийы Сæргълæууæг Сергей Меняйло.
Ныхасы архайджытæ се ’ргом аздæхтой федералон службæ æмæ республикæйы æмархайды фарстатæм, уыимæ, рагагъоммæ хатдзæгтæ скодтой Тæрхонадон пъырыстыфты службæйы цæгатирыстойнаг управленийы куыстæн.
Сергей Меняйло йæ раныхасы куыд фæбæрæг кодта, афтæмæй федералон службæ æмæ республикæйы разамынды ’хсæн хорз æмгуыстад равзæрд æппæт иумæйаг фарстаты фæдыл дæр. Пъырыстыфты службæйы архайд хорзæрдæм зыны Цæгат Ирыстоны барадон фæтк хъахъхъæныны хъуыддагыл.
Службæйы республикон управленийы куысты бæрæггæнæнтыл дзургæйæ, ныхасы архайджытæ куыд бафиппайдтой, афтæмæй ацы азы дæргъы тæрхонадон пъырыстыфтæ алыхуызон хæстæ æмæ æндæр æмбæлгæ фиддонтæй бадомдтой 2 миллиард сомæй фылдæр. Уыимæ, уыцы бæрцæй 503 милуан сомы æрвыст æрцыдысты федералон бюджетмæ. Бæрнон кусджыты хъусынгæнинагмæ гæсгæ, тæрхонадон пъырыстыфтæ сæ архайды уæлдай лæмбынæг æргом здахынц, социалон нысаниуæг кæмæн ис, уыцы административон хъуыддæгтæм. Афтæ, сывæллæттæ æмæ æндæр æнахъомты пайдайæн азы райдайæнæй нырмæ хæсдарджытæй бадомдæуыд 205 милуан сомы бæрц. Æмткæй райсгæйæ, ахæм административон-уголовон хъуыддæгтæн сæ 92 процентæй фылдæр баст вæййынц алименттæ райсыны фарстаимæ.
Фембæлды архайджытæ æрдзырдтой æндæр фарстатыл дæр.
Ныхасы архайдта Тæрхонадон пъырыстыфты федералон службæйы цæгатирыстойнаг управленийы разамонæг Къесаонты Игорь.
РЦИ-Аланийы Сæргълæууæг æмæ Хицауады пресс-службæ
