Уæрæсейы Президенты Æххæстбарджын минæвар Цæгат Кавказы Юрий Чайкайы разамындæй уыд Фæллойадон ахастдзинæдтæ нывыл кæныны фарстаты фæдыл федералон зылды къамисы уæрæх æмбырд. Фембæлды видеоконференцийы бастдзинады фæрцы архайдта РЦИ-Аланийы Хицауады Сæрдар Дзанайты Барис.
Æмбырды архайджытæ бæстон æрдзырдтой, 2024 азы 9 мæймæ Цæгат Кавказы федералон зылды регионты фæллойы базары уавæр куыд ивта, æнæ фæллойадон бадзырдтæй чи кусы, уыцы адæмы «аууонæй» ракæнын æмæ иннæ фарстатыл цы архайд цыд, ууыл.
Юрий Чайка йæ раныхасы куыд фæбæрæг кодта, афтæмæй амынд фарстатæ ахадгæдæр хуызы лыг кæныны нысанæн федералон зылды æппæт регионты дæр кусынц фæллойы базары нывылады фарстаты фæдыл ведомствæты ’хсæн къамистæ. «Федералон Хицауады уынаффæйæ уыцы къа-
мистæн лæвæрд æрцыдысты уæрæх æххæстбартæ, цæмæй сæ размæ ’вæрд хæстыл ахадгæ хуызы кусой. Уыимæ, къамисты архайдæн аргъгонд цæуы, алкæцы регионæн дæр рагагъоммæ цы пъланон нысантæ æвæрд æрцæуынц, уыдон къухы куыд æфтынц, уымæ гæсгæ. Уымæй уæлдай, фарстамæ сæрмагонд цæстдард ис Фæллойы федералон службæ æмæ æндæр профилон ведомствæты ’рдыгæй», – бафиппайдта Президенты минæвар.
Азы 9 мæйы архайды бæрæггæнæнтыл дзургæйæ, бæрнон ведомствæты минæвæрттæ куыд фехъусын кодтой, афтæмæй дзуаппон рæстæгмæ федералон зылды регионты рабæрæг, «аууоны» чи куыста, ахæм 58 мин адæймагæй фылдæр. Уыдонæй 53 мин адæймаджы ныридæгæн раивтой закъонæвæрынады уагæвæрдыл куыстмæ. Зæгъæм, 18,5 мин адæймаджы сæ куыстдæтджытимæ бафыстой фæллойадон бадзырдтæ, 25 мин адæймаджы бæрц регистраци скодтой хи чысыл куыстуæттæ, 9,5 мин адæймаджы та райстой хицæн амалхъомы æвдисæндартæ.
Ацы æмæ иннæ фарстатыл сæрмагонд пъланы бындурыл кусынц Уæрæсейы Фæллой æмæ социалон хъахъхъæнынады министрад, Фæллойы федералон службæ æмæ иннæ профилон ведомствæтæ. Æмбырды архайджытæ куыд фæбæрæг кодтой, афтæмæй амынд пъланы мадзæлттæ къæпхæнгай æххæстгонд цæуынц.
Цæгат Ирыстоны уавæрыл дзургæйæ, куыд загъдæуыд, афтæмæй азы 9 мæймæ республикæйы рабæрæг кодтой, «аууоны» чи куыста, ахæм 7,3 мин адæймаджы. Уыдонæй ныридæгæн 6,5 мин адæймаджы раивтой закъон-
æвæрынады уагæвæрды бындурыл куыстмæ, иннæты барадон уавæр банывыл кæныныл дæр архайд цæуы.
Æмбырды докладтæ скодтой æмæ фæндæттæ бахастой Фæллойы федералон службæйы разамонæджы хæстæ æххæстгæнæг Иван Шкловец, УФ-йы Социалон фонды сæрдары хæдивæг Александр Чернышев, УФ-йы Мидхъуыддæгты министрады цæгаткавказаг управленийы хицау Сергей Бачурин, æндæр ведомствæтæ æмæ регионты минæвæрттæ.
Æмбырдæн хатдзæгтæ кæнгæйæ, Юрий Чайка бæлвырд амынддзинæдтæ радта профилон ведомствæтæ æмæ федералон зылды регионты бæрнон кусджытæн.
Сланты Аслан
