Дунеон экономикон конференци «Уæрæсейы хуссайраг дуæрттæ-2024» ныр дæсæм хатт цæуы Дзæуджыхъæуы. Национ наукон библиотекæйы конференцийы архайджытæн фадат уыдис, нæ республикæйы амалхъомтæ æмæ æрмдæснытæ равдыстмæ кæй æрбахастой, уыцы продукци æмæ дзаумæттæ фенынæн. Хиконд куклатæ керамикæ æмæ æлыгæй конд, стæй цыллæ кæлмæрзæнтæ, сæракæйхуыд аив дзаумæттæ, гранулæты хуызы холлæгтæ хæдзарон фос æмæ кæсæгтæн, рæсугъдгæнæн дзаумæттæ, хъармгæнæнтæ æмæ æндæр цымыдисаг, фæсарæнтæм ласыны аккаг чи у, ахæм товартæ.
Конференцимæ æрбамбырд бирæ адæм, амалхъомтæ Цæгат æмæ Хуссар Ирыстонæй, Гуырдзыстонæй, Цæгат Кавказы республикæтæй, Сомихæй, суанг ма Туркæй дæр. Видеобастдзинад уыдис Белоруссийы минæвæрттимæ.
Æмбырд амыдта РЦИ-Аланийы Базарадон-промышленнон палатæйы президенты уынаффæгæнæг Тугъанты Хъазыбег.
Экономикон конференцийы архайджытæн зæрдиаг арфæ ракодта РЦИ-Аланийы Хицауады Сæрдар Дзанайты Барис.
– Цæмæй нæ республикæ æнтыстджын къахдзæфтæ кæна, нæ экономикæйы, нæ куыстуæтты хъомысдзинад рæза, уый тыххæй арæзт цæуынц ацы фембæлдтытæ. Иннæ регионтæ æмæ паддзахæдты ’хсæн хъуамæ цæгатирыстойнаг продукцийæн дæр йæ бон ерыс кæнын уа. Цы бирæ ахсджиаг æмæ вазыгджын фарстатыл æрдзурат, уыдон цæмæй царды уагъд æрцæуой, ууыл архайдзыстæм. Рæстæгимæ æмдзу кæнгæйæ, æмгуыстады бындурыл, хъæппæрис æвдисгæйæ æвзæрдзæн ног цымыдисаг проекттæ. Уæ архайд æнтыстджын æмæ пайдайаг уæд, – фæнысан кодта Дзанайты Барис.
РЦИ-Аланийы социалон-экономикон æмæ экспортон фæрæзты тыххæй радзырдта нæ республикæйы экономикон рæзты министр Сокаты Марат. Йæ хъуыдымæ гæсгæ, бизнес æмæ Хицауады уæнгты æмгуыстадæн хорз ахъаз уыдзæн дунеон экономикон конференци.
– Нæ республикæйы амалхъомады къабаз рапарахат кæнын, уæлдæр æмвæзадмæ йæ сисын, уыцы нысанимæ агурæм ног фæрæзтæ. Цæгат Ирыстон хуымæтæджы нæ хонынц Уæрæсейы хуссайраг дуæрттæ. Бирæ гæнæнтæ нын ис экономикæйы райрæзтæн, æддагон бизнес æрбаздахынæн. Хорз транспортон логистикæ, хæрзвадат регионалон æмæ федералон фæндæгтæ, нырыккон дыууæ уадзæн пункты, æфсæнвæндаг æмæ аэропорт, – загъта министр. – Æнтыстджынæй кусынц агропромышленнон, хъæдгуыстгæнæг æмæ æндæр къабæзтæ.
Уыимæ, нæ æрдзон æмæ климæты уавæртæ дæр зæрдæмæдзæугæ сты туризмы къабазы рæзтæн. Мамысоны, Къæхтысæры æмæ «Алания-парк»-ы фæлладуадзæн бынæттæ куы æркусой, уæд афæдзмæ иу милуан туристы цæудзысты уазæгуаты Ирыстонмæ.
Цæгат Ирыстоны Базарадон-промышленнон палатæйы президент Хъараты Анзор конференцийы архайджыты базонгæ кодта, РЦИ-Аланийы куыстуæттæй йæ продукци экспортмæ чи цæттæ кæны, уыдонæн цавæр æххуыс ис, уый тыххæй.
Амалхъомтæн æххуысы фонды директоры хæдивæг Дзæгъойты Аидæйæн йæ ныхас баст уыдис, ацы аз кæдæм æмæ цавæр продукци æрвыстой республикæйæ, æмгуыстады бындурыл хъуыддæгтæ куыд цыдысты, ууыл.
Онлайн-бастдзинады фæрцы конференцийы архайджытимæ ныхас кодта Уæрæсейы Базарадон-промышленнон палатæйы Æддагон бастдзинæдты департаменты директор Илья Нестеров.
Конференци йæ куыст адарддæр кодта цæлхæмбырдты хуызы. Йæ архайджытæ скодтой хатдзæгтæ æмæ æмгуыстады тыххæй бадзырдтæ бафыстой.
Гугкаты Жаннæ
