Ивгъуыд бонты Дзæуджыхъæуы цы мит рауарыд, уый алкæй зæрдыл дæр æрбалæууын кодта, Ног азы бæрæгбон та нæм кæй æрбахæццæ кæны, уый.
Уыцы æууæл хынцгæйæ, Цæгат Ирыстоны сæйраг горæты бынæттон хиуынаффæйады администраци дæр архайы бæрæгбоны фæлгонцад саразыныл, æхсæнадон фæлладуадзæн бынæттæ цæхæркалгæ конструкцитæй саив кæныныл. Уымæй уæлдай, куыст цæуы, цæмæй хæстæгдæр бонты кусын райдайой традицион ногазон армукъатæ дæр.
Уый тыххæй фехъусын кодта горæты администрацийы пресс-службæ.
Пресс-службæйы минæвары ныхасмæ гæсгæ, ногазон армукъатæ байгом уыдзысты 10 декабры.
Армукъатæн бынатæн та равзæрстой ахæм фæзуæттæ:
Владикавказаг уынг (Фонтанты фæзмæ ‘ввахс);
Мæскуыйаг уынг æмæ Къостайы проспекты тигъ (дукани «Кит»-мæ ‘ввахс);
Калинины æмæ Хъесайы-фырты уынгты тигъыл (дукани «Фишка»-мæ ‘ввахс);
Октябры 50 азы уынг (галуан «Электрон»-мæ ‘ввахс);
Барбашовы уынг ( «Олимпаг» паркмæ ‘ввахс);
Тамайы-фырты æмæ Куйбышевы уынгты тигъыл (Центрон базары фарсмæ скверы);
Коцойы-фырты уынг (инæлар Плиты Иссæйы цыртдзæвæнмæ ‘ввахс).
Базарадон фæзуæтты балхæнæн уыдзæн назбæлæстæ, ауындзгæ хъазæнтæ, сувениртæ æмæ æндæр лæвæрттæ. Армукъатæ кусдзысты 9 сахатæй 21 сахаты онг.
