Уæрæсейы Хицауады Сæрдары хæдивæг – промышленность æмæ базарады министр Денис МАНТУРОВЫ разамындæй уыд Промышленнон продукцийы æнæзакъон зилдухы ныхмæ паддзахадон къамисы ацы азы кæронбæттæн æмбырд. Видеоконференцийы бастдзинады фæрцы архайдта РЦИ-Аланийы Хицауады Сæрдар ДЗАНАЙТЫ Барис.
Федералон ведомствæты разамонджытæ æмæ хицаудзинады регионалон оргæнты минæвæрттæ æрдзырдтой къамисы ацы азы архайды рагагъоммæ бæрæггæнæнтыл, фæбæрæг кодтой фидæн азы куысты пълантæ.
Æмбырды архайджытæ бæстон æргом аздæхтой, алыхуызон къордты товартæ æмæ продукци-йыл сæрмагонд маркæтæ æвæрæны системæ регионты куыд рæзы, уымæ. Зындгонд куыд у, афтæмæй фæстаг цалдæр азы дæргъы бæстæйы фæлварæны хуызы пайдагонд цæуы хойраджы продукт-тыл, хостæ æмæ æндæр товартыл сæрмагонд маркæтæ æвæрыны фæткæй. Фæлхасгæнджытæм цы алыхуызон продукци æрвыст цæуы, уымæн йæ зынгæ хайыл (20 проценты бæрцыл) ныридæгæн базарадмæ рауадзыны размæ æвæрд цæуынц ахæм сæрмагонд нысантæ. Ахæм маркæты фæрцы «æлхæнæгмæ фæндаг» æхгæд æрцæуы, йæ хъæд цауд кæмæн у æмæ æдасдзинады домæнтæн дзуапп чи нæ дæтты, уыцы продукцийæн.
– Уыцы сæрмагонд маркировкæйы фæрцы дуканиты кассæтыл урæд æрцæуы бирæ цауд хойраг æмæ æндæр товартæ. Зæгъæм, æрмæст æхсыры продукцийы кой куы кæнæм, уæд æрхæссæн ис ахæм бæрæггæнæнтæ: ахæм хойрагыл маркæтæ æвæрын куы райдыдтой, уæдæй нырмæ дуканиты кассæтыл цы цауд продукци урæд æрцыд, уый бæрц сырæзт 40 хатты. Уыимæ, ныртæккæ сæйрагдæр æргом аздахын хъæуы бæлвырд нысанмæ – ахæм цауд продукцийæн хъуамæ фæндаг ма уа базарадон зилдухмæ. Уымæн бæлвырд гæнæнтæ ис – хæстæгдæр рæстæг æмбæлгæ уынаффæтæ дæр фидаргонд æрцæудзысты, – бафиппайдта сæрдари-уæггæнæг.
Ацы æмæ иннæ фарстаты фæдыл фиппаинæгтæ æмæ фæндæттæ бахастой профилон федералон ведомствæтæ æмæ регионты минæвæрттæ.
Ныхасæн хатдзæгтæ кæнгæйæ, Денис Мантуров федералон ведомствæты минæвæрттæн бацамыдта, цæмæй сæрмагонд маркировкæ æвæрыны системæйы райрæзтæн уæлæмхасæн фадæттæ арæзт æрцæуа, цæмæй раззагдæр регионты фæлтæрддзинад апарахат кæной иннæ субъекттыл дæр.
СЛАНТЫ Аслан
