Хетæгкаты Къостайы номыл Цæгат Ирыстоны паддзахадон университет дарддæр æмгуыстад кæны раззагдæр уæрæсейаг æмæ фæсарæйнаг университеттимæ, сæрмагондæй та национ наукон-иртасæн центр «Курчатовы институт» æмæ ядерон иртасынæдты иумæйаг институтимæ бастдзинæдтæ фæуæрæхдæр кæныныл.
Нæ республикæ æмæ Центры ‘хсæн 2023 азы майы арæзт æрцыд
æмгуыстады бадзырд, йæ бындурыл ныртæккæ ЦИПУ-йы æххæстгонд
цæуынц ахуырадон, квалификаци фæбæрзонддæр кæнын æмæ стажировкæйы программæтæ, стæй ахуырадон æмæ наукон-иртасæн проекттæ.
Афтæ ма ацы азы апрелы Дзæу-джыхъæуы конд æрцыд Курчатовы номыл ахуырадон форум, æмæ институт балæвар кодта ЦИПУ-йы физикæ-технологон факультетæн лабораторон кусæнгæрзты комплекттæ, ома, кусæнгæрзтæ алыхуызон фæлварæнтæн механикæйы, молекулярон физикæйы, оптикæйы, электродинамикæйы, электростатикæйы, электролизы æмæ афтæ дарддæр. Нæ курдиатджын студенттæн дзы ис фадат спайда кæнынæн, сæ иртасæнтæ аразгæйæ.
Сæрды Мæскуыйы Курчатовы номыл институты ацыдысты Цæгат Ирыстоны бонтæ. Архайдтой дзы Цæгат Ирыстоны паддзахадон университеты, Цæгат Кавказы хæххон-металлургон институты, Хæххон паддзахадон аграрон университеты æмæ æндæр уæлдæр скъолаты ахуыргæндтæ. Нæ университеты ахуыргæндтæ къуырийы дæргъы студенттæ æмæ скъоладзаутæн кастысты лекцитæ æмæ арæзтой
мастер-класстæ. Сывæллæттæ дзы архайдтой хъæдæрмæг лыг кæнынæй, ирон кæлмæрзæн бийынæй, къуымбилмæ базилынæй…
Наукон-зонадон хай арæзт уыд хими, биотехнологи, когнитивон иртæстытæ, археологи, инженерон технологи æмæ æнæниздзинад хъахъхъæныны лекцитæй.
Зæгъын хъæуы уый, æмæ университеты ректор Огъуаты Алан хорзæхджын æрцыд А.В.Курчатовы II къæпхæны майданæй «Уæрæсейы стратегион национ приоритетты интерестæм гæсгæ национ наукон-иртасæн центр «Курчатовы институт»-имæ бæрзонд æмгуыстады тыххæй».
Афтæ ма нæ унивеситеты 2018 азы байгом Уæрæсейы фыццаг ядерон иртасынæдты иумæйаг институты информацион центр. Уæдæй нырмæ центры нæ студенттæ базыдтой бирæ ног æмæ зæрдæскъæфæн хабæрттæ.
Бынтон æрæджы та физикон-технологон факультеты декан Дауыраты Альбинæ раныхас кодта Хуссар Африкæйы ядерон иртасынæдты иумæйаг институты информацион центры байгом кæныны мадзалы. Центр байгом кодтой наукон-иртасæн лабораторийы бындурыл.
Кæй зæгъын æй хъæуы, нæ паддзахады алыхуызон уæлдæр ахуыргæнæндæтты æнтыстджын æмархайд кæрæдзиимæ æмæ фæсарæйнаг ахуыргæнæндæттимæ, бæрæг куыд у, афтæмæй нырыккон ахуырадон процессы рæзты хорзæрдæм зыны.
Милдзыхты Аэлитæ, филологон зонæдты кандидат, ЦИПУ-йы ахуыргæнæг
