РЦИ-Аланийы Хицауады радон æрвылкъуырион аппаратон æмбырд амыдта республикæйы Сæргълæууæг Сергей МЕНЯЙЛО. Хицауады уæнгтæ, министрадтæ, ведомствæтæ æмæ районты разамонджытимæ ныхас уыд республикæйы цæрджыты донивылдтытæй бахизыныл, артаджы аргъ уæлæмæ ма суадзыныл æмæ æндæр ахсджиаг фарстатыл.
Хицауады Сæрдары хæдивæг Томайты Ирбег йæ раныхасы фехъусын кодта республикæйы оперативон уавæр.
– Республикæйы быдираг районты дарддæр дæр зынгсирвæзтытæй тæссаг кæй у, уымæ гæсгæ Цæгат Ирыстоны æппæт сæрмагонд службæтæ дæр архайынц бæрзонд цæттæдзинады уавæры. Ивгъуыд къуырийы дæргъы ахуыссын кæнын бантыст 32 зынгсирвæзты. Хъыгдард æмæ дзы зиантæ ничи баййæфта. Республикæйы фæндæгтыл 20-26 июлы æрцыд 106 фæндаггон фыдбылызы. 14 адæймаджы дзы хъыгдард баййæфтой, æмæ сæ вæстиатæй рынчындонмæ аластой. Арвыком æмæ Транскамы фæндæгтæ гом сты транспорты æппæт хуызтæн дæр. Ныртæккæ республикæйы фæндæгтыл электронон рады лæууынц 63 автотранспортон иуæджы. Ивгъуыд къуырийы дæргъы Уæрæсе æмæ Гуырдзыстоны арæныл дыууæрдæм ахызтысты 30430 автотранспортон иуæджы æмæ 101945 адæймаджы, –загъта Томайы-фырт.
Республикæйы Мидхъуыддæгты министрады хъусынгæнинагмæ гæсгæ, ивгъуыд къуырийы дæргъы регионы æрцыд 144 фыдракæнды, раргом кæнын дзы бантыст 93. Æбæрæг фыдгæнджытæ цалдæр хатты фехъусын кодтой мидхъуыддæгты оргæнтæм, Дзæуджыхъæуы тæрхондоны уагдæтты рæмудзæн æрмæг кæй бавæрдтой, уый тыххæй. Æппæт хъæугæ оперативон мадзæлттæ саразгæйæ, бæрæггонд æрцыд, хъусынгæнинаг мæнг кæй разынд, уый.
«Роспотребнадзор»-ы цæгатирыстойнаг хайады хъусынгæнинагмæ гæсгæ, республикæйы эпидемиологон уавæр у нывыл. Цæстдард цæуы нуазыны доны хæрзхъæддзинад æмæ сыгъдæгдзинадмæ. Иу адæймагмæ разынд ног коронавирусон инфекци.
РЦИ-Аланийы Цæрæнуатон-коммуналон, артаг æмæ энергетикæйы министрады хъусынгæнинагмæ гæсгæ, зымæджы хъармгæнæн
рæстæгмæ цæттæдзинады куыстытæ кæронмæ фæхæццæ кæнынц. Уымæй уæлдай, ведомствæйы министр Хъараты Тимур фехъусын кодта, республикæйы артаг фаг кæй ис, уый. «Роснефть» æмæ «Газпром»-мæ æрвылбон дæр ласынц артаг. Федералон антимонополон службæимæ куыст цæуы, хицæн адæймæгты къухты цы артаг æвгæнæн бынæттæ ис, уым æргътæ уæлæмæ сисын ма бауадзыныл.
– Куыддæр артагыл æргътæ уæлæмæ сисой, афтæ сын сæ документтæ прокуратурæмæ бадæттут, – бафæдзæхста регионы
разамонæг.
Æрæджы газы техникæйы аххосæй машинæ кæй срæмыгъта, уый тыххæй регионы разамонæг бæрнон ведомствæтæн бахæс кодта артаг æвгæнæн бынæтты æдасдзинады фарстатæм лæмбынæгдæр æркæсын, уыцы техникон фæрæзтæ закъоны бындурыл æвæрд цæуынц, лицензи сæм ис, æви нæ, уый сбæрæг кæнын.
Республикæйы ахуырад æмæ наукæйы министр Алыбегты Эллæйы хъусынгæнинагмæ гæсгæ, регионы æппæт бындурон цалцæггæнæн куыстытæ дæр кæронмæ фæхæццæ кæнынц. Ацы аз райстам фыццæгæм къласмæ бацæуыны 6750 курдиаты.
Сергей Меняйло ахуырад æмæ наукæйы министрæн бафæдзæхста фыццагкъласонтæн ног ахуыры азмæ афойнадыл лæвæрттæ бацæттæ кæнын, æркæсын скъолаты тæвд хæринаджы фарстамæ, стæй рæвдауæндæтты уавæртæм дæр æргом аздахын.
Республикæйы Сæргълæууæг ма фæбæрæг кодта, уæлдæр ахуыргæнæндæттæм бацæуынæн фыццаградон бар сæрмагонд æфсæддон операцийы фæмардуæвæг æфсæддонты сывæллæтты куыд уа, уый.
Æмбырды ма ныхас кодтой æндæр ахсджиаг фарстатыл дæр.
ХЪОЙБАЙТЫ Галинæ
