РЦИ-Аланийы Сæргълæууæг Сергей Меняйло цы аппаратон æмбырд сарæзта, уым ныхас цыд ивгъуыд къуырийы бæрæггæнæнтæ æмæ фидæны нысантыл. Архайдтой дзы нæ республикæйы Хицауады уæнгтæ, муниципалон скондты сæргълæуджытæ, министрадтæ æмæ иннæ ведомствæты разамонджытæ.
Хицауады Сæрдары хæдивæг Томайты Ирбег куыд радзырдта, афтæмæй фæстаг къуырийы дæргъы республикæйы æнæнхъæлæджы цаутæ бæрæггонд не ‘рцыд. Арвыкомы фæндаг гом у æппæт транспорты хуызтæн дæр. Хæхты 2000 метрæй уæлдæр тæссаг у зæйтæ рацæуынæй. Республикæйы фæндæгтыл æрцыд
97 фыдбылызы.
– Республикæйы фæндæгтыл лæууынц 945 уæзласæн машинæйы, уыдонæй 650 – сæрмагонд бынæтты. Электрон рады æнхъæлмæ кæсынц 1,4 мин хæдтулгæйы. Ивгъуыд къуырийы Гуырдзыстоны арæныл ахызтысты 18 мин автотранспортон иуæджы æмæ 40,7 мин адæймаджы, – фехъусын кодта Томайы-фырт.
«Роспотребнадзор»-ы хъусынгæнинагмæ гæсгæ, республикæйы эпидемиологон уавæр улæфæнты низтæ æмæ гриппæй у 6,9 проценты. Медицинон организацитæм æххуысмæ чи æрбадзырдта, уыдоны 60 проценты бæрц сты рынчын сывæллæтты тыххæй. Уыимæ, ахуырад æмæ наукæйы министр Алыбегты Эллæйы ныхасмæ гæсгæ, иунæг скъола æмæ рæвдауæндон дæр æхгæд не ’рцыд. Æххæстгонд цæуынц «Роспотребнадзор»-ы домæнтæ.
Улæфты бонты авари кæй æрцыд, æмæ Дзæуджыхъæуы районтæй иуы цæрджытæ 18 сахаты бæрц æнæ рухсæй кæй баззадысты, уый тыххæй республикæйы Сæргълæууæг разыйæ нæ баззад «Цæгкавказэнерго»-йы куыстæй. Уый фæдыл Сергей Меняйло бахæс кодта электрон хызы æппæт организациты дæр сбæрæг кæнын оперативон штабтæ, аварион бригадæтæ æмæ радгæс фæрæзтæ.
Республикæйы Сæргълæууæг ведомствæты разамонджытæй æрдомдта, цæмæй иудадзыгдæр телефонæй бастдзинад семæ уа, суанг улæфты бонты дæр.
Дарддæр ма Сергей Меняйло районты разамонджытæн бахæс кодта Фыдыбæстæйы Стыр хæсты Уæлахизы 80 азы бонмæ æппæт мемориалтæ дæр банывыл кæнын, уыимæ – Намысы мемориал Дзæуджыхъæуы æмæ Барбашовы фæз дæр.
Дзæуджыхъæуы бынæттон хиуынаффæйады разамонæг Милдзыхты Вячеслав куыд фехъусын кодта, афтæмæй Намысы мемориалы фæзуаты Стыр Уæлахизы бонмæ сцалцæг кæнын бантысдзæн æрмæст стелæ, иннæ куыстытæ конд æрцæудзыс-
ты фæстæдæр. Дарддæр уал, йæ ныхасмæ гæсгæ, æххæстгонд æрцыд Фæскомцæдисон парчы рацарæзты фыццаг къæпхæн, дыккаг та пъланмæ гæсгæ фæуыдзæн иннæ аз.
Сергей Меняйло бафæдзæхста, нæ республикæйы цæрджытæй Цæгат Ирыстоны историйы йæ архайдæй зынгæ фæд чи ныууагъта, экономикæ, культурæ æмæ царды иннæ къабæзты, уыдоны тыххæй нымæцон æмæ мыхуырон чиныг саразын. Уыцы куыст бахæс кодта историйы институтæн, сæрмагондæй та – Бзарты Русланæн.
– Хъæугæ информаци æмæ æрмæджытæ æмбырд кæнынмæ сын феххуыс кæндзысты студенттæ дæр, – фæбæрæг кодта республикæйы Сæргълæууæг.
УФ-йы Президент Владимир Путины бардзырдмæ гæсгæ, 2025 аз нысангонд æрцыд Фыдыбæстæ хъахъхъæнæджы азыл. Уый фæдыл Сергей Меняйло ахуырад æмæ наукæйы министр Алыбегты Эллæйæн бахæс кодта сæрмагонд программæ саразын – «Ирыстоны Хъæбатыртæ».
– Бирæ ныййарджытæ не ’мбарынц, «Дневник.ру» цæмæн хъæуы, уый, – фæбæрæг кодта республикæйы Сæргълæууæг. Уый фæдыл бахæс кодта, ныййарджытæн баххуыс кæнын æмæ сын æмбарын кæнын, «Дневник.ру»-йы регистраци æнæмæнгхъæугæ хъуыддаг кæй у, уый.
Уымæй дарддæр ма регионы разамонæг бахаста фæндон,
ахуырады ныллæг бæрæггæнæнтæ цы скъолатæ равдыстой, уыдонæн æххуысæн сæрмагонд программæ саразын.
– Алы скъолайы дæр, кæцыфæнды хъæуы, кæнæ районы куы уа, уæддæр ахæм уавæртæ саразын хъæуы, æмæ дзы чи ахуыр кæны, уыдон исой хæрзхъæд, нырыккон домæнтæн дзуапп чи дæтты, ахæм ахуырад, – загъта Сергей Меняйло.
Ноджы ма республикæйы Сæргълæууæг бафæдзæхста сбæрæг кæнын, йе ’нæниздзинад хъыгдард кæмæн у, уыцы сывæллæттæн цавæр сфæлдыстадон къордтæ арæзт цæуы, уый.
Дарддæр ма ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
