Йæ кад æнустæм у цæринаг

0
24

Ирыстон бирæ кадджын фæлтæртæ бахъомыл кодта.  Нæ бæстæйы сæрвæлтау  йæ уд чи  снывонд кодта, адæмæн хорздзинæдтæ хæссын йæ царды сæйрагдæр нысаныл чи нымадта, ахæмты. Æмæ уыдонæй иу уыд хъæбатыр хæстон, инæлар-лейтенант Хуыдæлты Алексейы фырт Харитон. Ацы аз январы  йæ райгуырдыл æххæст кæны  120 азы. Йæ хæстон фæндæгты тыххæй æнæхъæн чиныг ныффыссæн ис. 2004 азы Беслæны теракты чи фесæфт, уыдоны ‘хсæн уыдис Хуыдæлты Эльбрус йæ лæппу  Георимæ. Æмæ уыдоны тыххæй æрмæг куы цæттæ кодтон, уæд базонгæ дæн Эльбрусы кæстæр æфсымæр Валериимæ.  Уымæй фехъуыстон  сæ мыггаджы номдзыд лæгтæ  Харитон, Темырсолтан æмæ Саханджерийы кой.

– Мах, мыггаджы фæлтæртæ, сæрыстыр стæм нæ хистæртæй. Харитон æмæ Темырсолтан  хæстон лæгтæ уыдысты, æмæ сын се сгуыхтдзинæдтæ зонæм кæс-
тæрæй зæронды онг. Кад сын кæнæм сæ нæмттæн дæр. Æхсæны хъуыддаджы сæ кой куы рацæуы, уæд иууылдæр сæ бынæттæй фестынц, ахæм цыт сын ис канд нæ мыггаджы нæ, фæлæ æнæхъæн Ирыстоны цæрджыты ‘хсæн дæр, – загъта Валери.

Хуыдæлты Харитон райгуырд Дыгургомы Фæрæскъæтты хъæуы мæгуыр лæджы хæдзары. Мæхческы дины приходы скъолайы ахуыр кодта. Ахуыргæнæг та йын уыдис Гарданты Михал, уый фæстæ та Фæснæлы райдайæн скъола каст фæци. 1924 азы Харитон зæрдиагæй тох кодта æнахуыргонддзинады ныхмæ. Хæхбæсты зæронд адæмæн лæвæрдта ликбез. Хуыдæлты бинонтæ быдырмæ ралыгъдысты æмæ æрцардысты Дур-Дуры. Ацы ран Харитон куыста хъæууон чысыл библиотекæйы сæргълæууæгæй, уырыссагау æй изба-читальня хуыдтой, стæй йæ хъæуы фæсивæд фæскомцæдисы организацийы нымæрдарæй равзæрстой. Харитоны æвзонг азтæ æнцон нæ уыдысты. 1927 азы йын йæ фыды æрцахстой кæйдæр хахуыртæм гæсгæ.
ГУЛАгы лагертæй иуы йæ 1937 азы  амардтой.

1926 азы Харитонмæ фæсидтысты, Дзæуджыхъæуы  мæгуыр кусæг фæсивæды Сырх Æфсады кавалерион полкъмæ, (РККА). Афæдзы фæстæ йæ арвыстой Краснодармæ Цæгат-Кавказаг  адæмты кавалерион скъоламæ ахуыр кæнынмæ. «Адæмы зна-
джы» фырт, ахæм цæстæй йæм кастысты, фæлæ, уæддæр йæ ныфс нæ асаст æмæ дарддæр йæ ахуыры куыст кодта.

1930 азы Хуыдæлты Харитон командæ кæнын райдыдта 66-æм кавалерион полкъæн. 1940 азы та 62-æм хицæн сгарæг батальонæн. Уыцы  аз немыцаг фашисттæ бацахстой европæйаг бæстæтæ,  æмæ Харитоны арвыстой  æппæты зындæр æмæ бæрнондæр ран – Заполярьемæ. Сырх Æфсады хæстон фæлтæрддзинад æм дæс азы уыд, æмæ сæрæн, рæвдз æмæ арæхстджынæй равдыста йæхи. 1941 азы гермайнаг æфсæдтæ нæ бæстæмæ куы æрбабырстой, уæд разамынд лæвæрдта моторотæйæн æмæ фæтыхджындæр кодта 58-æм Цæгатаг полкъ. Фашистты фæнд Советон Заполярье æддагон бастдзинадæй  аиуварс кæнын, æппæт коммуникацитæ аскъуынын – сæ къухы нæ бафтыд. Ацы ран Харитоны полкъ ныддæрæн кодта немыцаг  æфсæдты. Знаг фесæфта 1250 салдаты æмæ бирæ техникæ. Уыцы рæстæг советон æфсæдтæ æппæт фронтты дæр фæстæмæ цыдысты, Харитонæн та бантыст  Заполярье знагæй суæгъд кæнын. Ацы хæстон цауы фæдыл Харитоны хæрзиуджыты сыфы фыст æрцыд: «За умелое руководство полком в критический момент и решительное проведение контрнаступления, достоин правительственной  награды – Ордена Красного Знамени».

Ахæм цаутæ хъæбатыр хæстоны æфсæддон службæйы бирæ уыд.  Сырх Тырысайы ордены фæстæ Хуыдæлы-фырт хорзæхджын æрцыд: Ленины, Александр Невский, Суворовы дыккаг къæпхæны,  Сырх  Стъалыйы, Фыдыбæстæйы Стыр хæсты фыццаг къæпхæны ордентæй, норвегиаг «Сыгъдæг Олафы» «Командорская Звезда», зæгъгæ,  къæпхæны орденæй æмæ бирæ æндæр хæрзиуджытæй. 1941 азы, 28 июны Хуыдæлты Харитоны полкъæн бацайдагъ карз хæст немыцæгты егерты-дивизийы 2-аг дæлхайæдтимæ, (отряд группы Баха) Баренцы денджызы былгæрон. Харитон йæ хъæбатыр хæстонтимæ нæ бауагъта знаджы Мурманскмæ баирвæзын. Аст суткæйы дæргъы тугуарæн хæсты тыхджын ныхкъуырд ратта гитлеронтæн.

Хæсты райдайæны, авд мæйы фæстæ не ‘мзæххон райста дæлбулкъоны цин æмæ командæ лæвæрдта  14-æм æфсады Карелаг фронты 14-æм æхсæг дивизи-
йæн, æрдæгсакъадах Рыбачийы. Æртæ мæйы фæстæ йын булкъоны цин радтой æмæ нысангонд æрцыд  æхсæг дивизийы 10-æм гвардион полчъы командирæй.  Фондз мæйы фæстæ та ногæй Харитонæн инæлар-майоры цин саккаг кодтой. Октябры 1944 азы  инæлар-майор Хуыдæлы-фырты разамындæй йæ дивизи 99-æм æхсæг корпусы сконды, афтæмæй архайдта Петсамо-Киркенессаг ныббырсты операцийы.  Йæ хæйттæ  ахызтысты цæугæдæттæ  Валасйоки æмæ Луостарийыл  æмæ 15 октябры  суæгъд кодтой горæт  Петсамо (Печенга).  Сæ æнæнхъæлæджы æхсæвыгон ныббырстытæй Харитоны гвардионтæ стыр тасы бафтыдтой немыцæгты. Знаджы  æртæ пункты  ныддæрæн кодтой фашистты гарнизонтæ æмæ  та ахызтысты цæугæдон Титовкайы сæрты, йæ хæстонтæй иу дæр нæ фæхъуыд, афтæмæй. 1944 азы 25 октябры, знаджы фæдыл зилгæйæ,  дивизи Норвегийы паддзахадон арæныл тынг зын уавæрты  ахызт  æмæ бацахста Заполярьейы горæт Киркенесс, Баренцы денджызы  вазыгджын наулæууæн. Уый фæстæ та архайдта знаджы лапландиаг къорд ныддæрæн кæныны  кæронбæттæн  хæсты. Уыцы сгуыхтдзинæдты фæдыл Харитоны дивизийæн лæвæрд æрцыд  «Печенгская»-йы кадджын ном.

1944 азы 30 октябрæй – 1945 азы 15 февралмæ дивизи аивтой Польшæмæ. Ацы ран архайдта Белоруссаг фронты дыккаг  æфсады 40-æм гвардион æхсæг корпусы сконды, Скæсæн-Померанаг ныббырстыты операцийы. Советон хæстонты хъæбатыр сгуыхтдзинæдтæ та ацы ран дæр æнæбафиппайгæ нæ уыдысты уæлдæр командæгæнынадæй æмæ дивизи хорзæхджын æрцыд Сырх Тырысайы орденæй. Дарддæр Харитоны æфсад ссæрибар кодта горæттæ: Штегерс, Бальденберг æмæ Бублиц. Дивизийæн лæвæрд æрцыд Александр Невскийы орден.
Хæсты азты дивизийы командир Хуыдæлты Харитон иуæндæс хатты  амынд æрцыд   Сæйраг  Командæгæнæджы  арфæйы  бардзырдты.

Фæцис хæст,  æмæ  сабыр дуне ралæууыд. Фæлæ  Хуыдæлы-фырт йæхицæн æнцой нæ ардта. 1954 азы  инæлар ссис Фрунзейы  номыл Æфсæддон  академийы уæлдæр курсыты хъусæг.   Инæлар-лейтенанты цин Харитонæн лæвæрд æрцыд  1955 азы августы. Æрдзон зонд, таурæгъон  хъайтар æмæ хæстон фæлтæрддзинад ын уæрæх фæндаг раттой Гæрзифтонг тыхты системæйы.  1957 азы Харитон нысангонд æрцыд  Приволжьейы æфсæддон зылды  хæстон цæттæдзинады управленийы  командæгæнæджы хæдивæгæй.  1960-1961 азты та æрвыст æрцыд граждайнаг хъахъхъæнынады æфсæдты командæгæнæгæй. Цы бирæ æфсæддон кадртæ бахъомыл кодта нæ бæстæйæн, уыцы архайдæн ын  нæ бæстæ стыр аргъ скодта. Йæ дæргъвæтин цардвæндаджы цы бирæ цаутæ æрцыд, уыдон йæ зæрдæйы арфы  æвæрдæй фæдарын нæ баци йæ бон, æмæ йæ мысинæгтæ мыхуыры рауагъта хицæн чингуытæй : «У кромки континента», «Долг памяти», «У скалистых гор» сæргæндтимæ.

Ирон æфсæддон интеллигенцийы раззагдæр рæнхъыты кадджын бынат ахсы Хуы-
дæлты Алексейы фырт Харитон. Йæ царды, йе ‘взонджы бонтæй фæстæмæ снывонд кодта йæ уарзон Ирыстон æмæ нæ цытджын бæстæйы хæрзамондæн. Хæсты рæстæг æххæст кодта паддзахадон хæслæвæрдтæ бæрнон æмæ сыгъдæгзæрдæйæ. Хуыдæлты Харитон йæ цардæй ахицæн 2000 азы 7 июлы. Кадимæ йæ бавæрдтой Дзæуджыхъæуы сæрмæ Кады аллейы.

Харитон ма хорзæхджын æрцыд Жуковы орден æмæ майдан «Ирыстоны намысæн»-æй.

 

Æрмæг бацæттæ кодта
Саутæты Тамилæ

 

ОСТАВЬТЕ ОТВЕТ

Please enter your comment!
Please enter your name here