Ивгъуыд аз сбæрæг кодтам ирон адæмы генион поэт Хетæгкаты
Къостайы райгуырды 165 азы бон. Иры æрдхæрæны фырты тыххæй фаг ныхæстæ, æвæццæгæн, ссарæн нæй, кæд нæ газет тынг бирæ хъæздыг æрмæг ныммыхуыр кодта йæ кадæн, уæддæр. Фæлæ Къостайы бирæвæрсыг сфæлдыстады тигътæ æххæстæй абон дæр нæма раргом сты.
Курдиатджын, арæхстджын нывгæнæг кæй уыд Хетæджы-фырт, уый бирæ йе ’мдугон иртасджытæ æмæ нывгæнджытæ загътой ивгъуыд рæстæджы. Мах уыдонæй хуыздæр нæ зæгъдзыстæм. Зонæм ын йæ зындгонд куыстытæ. Фæлæ дисы куыд не ‘фтауы, 1887 азы фыст «Спас нерукотворный», зæгъгæ, цы уазныв фыст æрцыд, уый. Фенæн æй ис Хуссар Ирыстоны Национ музейы Цхинвалы.
Къоста сныв кодта Чырыстийы сурæт, сфыста йæ Аннæ Поповайы æфсымæр Яковы цæсгомæй, ома, уый бадт йæ разы, ныв кæнгæйæ. 1902 азы четæн балæвар кодта Аннæ Поповайæн ахæм ныхæстимæ: «Стыр аргъ кæмæн кæнын, уыцы Аннæйæн зæрдылдарынæн – Къостайæ».
Нывмæ кæсынмæ, куыд фæзæгъынц, цæсты тигътæ нæ лæууынц, четæныл Чырыстийы цæстæнгас йæхимæ ‘лвасы, адæймаджы рæсугъд, уæлмонц хъуыдытыл æфтауы. Уый та, куыд зонæм, афтæмæй аивадæн у йе стырдæр нысан.
ГАПБАТЫ Алетæ