Нæ республикæйы разамонæг Сергей Меняйло, бархиондзинады змæлдмæ йæ зæрдиаг архайдæй стыр æвæрæн чи бахаста, уыдоны схорзæхджын кодта РЦИ-Аланийы Сæргълæууæджы Кады гæххæттытæ æмæ æхцайы премитæй.
Сергей Меняйло куыд фæбæрæг кодта, афтæмæй бархионтæ æмæ, барвæндæй йæ Фыдыбæстæ бахъахъхъæнынмæ цæттæ чи у, уыдон кæнынц æхсæнадæн æнæмæнг хъæугæ куыст. Æрвылбон архайынц иннæтæн хорздзинад саразыныл, искæмæн тыхст сахат баххуыс кæныныл. Уымæй, ахæм адæм истæмæ не ’нхъæлмæ кæсынц. Сæ удыхъæд ахæм у – фæнды сæ адæмæн æххуыс кæнын, сæ райгуырæн бæстæйæн пайдайаг уæвын. Уымæн сты хуыздæр дæнцæг канд нæ республикæйы нæ, фæлæ æппæт бæстæйы цæрджытæн дæр.
– Уый у уæлдай курдиат – уæззау уавæры чи ис, уыдонæн сæ зыны сахат сæ фарсмæ балæууын æмæ сын баххуыс кæнын. Фæнды мæ стыр бузныг зæгъын æппæт бархионтæ æмæ бархион æхсæнæдты уæнгтæн, – загъта регионы разамонæг.
Дипломтæ æмæ 50 мин сомы бæрц премитæ Сергей Меняйлойы къухæй райстой уæлахиздзаутæ Акъоты Батрадз, Ларисæ Хохлачева æмæ Дмитрий Ларин.
ХЪОЙБАЙТЫ Галинæ