Свердловскы облæсты, горæт Уæллаг Пышмайы 5-9 февралы уæззау атлетикæйæ цыдысты Уæрæсейы Кубок рамбулыныл ерыстæ нæлгоймаг æмæ сылгоймаг спортсменты ’хсæн. Ирыстойнаг уæззау атлетикæйы скъолайы минæвæрттæ ерысты архайдтой астæй.
Сылгоймæгты ерысты æнтыстджын рауад Уæрæсейы сгуыхт тренер Золойты Хъазыбеджы хъомылгæнинæгтæ Гусалты Зæринæ æмæ Теблойты Данæйы архайд.
Уæрæсейы чемпионкæ Гусалты Зæринæ, 71 кг онг уæзы ерыс кæнгæйæ, ацы хатт дæр та йæ разæй никæй ауагъта. Ерысты фыццаг хуызæй уыцы иу истæй равдыста 109 кг. Йæ хæдфæстæ чи цыди, уыцы штангисткæ Валентинæ Гусева систа 5 кг къаддæр.
Ерысты дыккаг хуызæй дыу-уæйæ дæр сæ риуæй сысхуыс-той 130 кг уæзон штангæ. Афтæмæй Зæринæ дыууæ хуызы систа 239 кг (109+130) æмæ бацахста 1-аг бынат.
Хорз бæрæггæнæнтæ равдыста нæ 19-аздзыд чызг Теблойты Данæ дæр. 87 кг онг уæзы дыууæ хуызы систа 222 кг (105+117) æмæ бацахста 2-аг бынат. Данæ, фыццаг хуызы ерыс кæнгæйæ, цы штангæ систа, уый уæз уыди Уæрæсейы ног рекорд 20 азы карæн фæсивæды ’хсæн. Йæ разæй чи фæци, уыцы чызг Аннæ Зубко та дыууæ хуызы систа Данæйæ иу килограмм фылдæр.
Сылгоймæгты ерысты ма архайдта тренер Æлборты Вадимы 15-аздзыд хъомылгæнинаг
Анастасия Черемных. Уый 49 кг онг уæзы дыууæ хуызы систа 149 кг (65+84), æмæ йын ахæм бæрæггæнæн не сфаг призон бынат бацахсынæн.
Ирон тренер Гаситы Русланы хъомылгæнинаг чызг Анастасия Анзорова, Тюмены облæсты спортивон кад хъахъхъæнгæйæ, фæуæлахиз 64 кг онг уæзы
ерысты.
Æнтыстджын рауад нæлгоймæгты ерысты ирыстойнаг штангистты архайд. Нæ фондз лæппуйæн бантыст иу сыгъзæрин, дыууæ æвзист æмæ иу бронзæ хæрзиуæджы рамбулын.
Нæ штангисттæй фыццаг æвзист хæрзиуæг рамбылдта Золойты Хъазыбеджы хъомылгæнинаг Теблойты Сæрмæт. 102 кг онг уæзы дыууæ хуызы æрæмбырд кодта 373 кг (171+202) æмæ бацахста 2-аг бынат. Йæ уæзы уæлахиздзау ссис Мæс-куыйы минæвар Георгий Купцов. Уымæн бантыст Сæрмæтæй æртæ килограммы фылдæр сисын – 376 кг (173+203).
Дыккаг æвзист майданæй хорзæхджын ссис Наниты Тимур. 109 кг онг уæзы дыууæ хуызы систа 385 кг (175+210). Уый уыд, 1-аг бынат бацахсæг Хас-Магомед Балаев кæй систа, уымæй 3 кг къаддæр, æмæ Тимур ацы хатт æрлæууыд 2-аг бынаты. Кæд ын 1-аг бынатмæ рацæуын нæ бантыст, уæддæр Нанитæ æнæ сыгъзæрин хæрзиуæгæй нæ баззадыс-ты.
Уæззау уæзы (109 кг+) Наниты Арсен фæразæй йæ авд ныхмæлæууæгæй æмæ ссис Уæрæсейы Кубок рамбулæг æппæты уæззаудæр уæзы. Дыууæ хуызы равдыста 404 кг (188+216). Уый бæрц сисын æгас ерысты дæр никæмæн бантыст. Йæ фæс-тæ 2-аг бынатмæ рацыд Тимур Мариев (Кæсæг-Балхъары Республикæ). Уый дыууæ хуызы равдыста 396 кг (180+216). Уымæй фондз килограммы къаддæр рауад ерысты 3-аг бынат бацахсæг Мерденты Арсены бæрæггæнæн – 391 кг (167+224).
Азы фыццаг стырдæр ерысты ирыстойнаг штангистты архайд хорзыл банымадта РЦИ-Аланийы иугонд командæйы хистæр тренер Дзбойты Петр: «Нæ спортсментæ нымадæй кæд бирæ нæ уыдысты азы фыццаг стырдæр ерысты, уæддæр раппæлинаг у, сæ къухы цы æнтыстдзинад бантыст, уый. Нæ штангистты архайд дзурæг у, нæ республикæйы уæззау атлетикæйы скъола Уæрæсейы раззагдæртæй дзæгъæлы нымад кæй нæу, ууыл. Кæй зæгъын æй хъæуы, алкæддæр фæфæнды ноджы фылдæр сгуыхтдзинæдтæ равдисын. Мæнæ ныр дæр уыди гæнæн, æмæ дыууæ сыгъзæрин майданæй фылдæр рамбулæм. Зæгъæм, сыгъзæрин хæрзиуæг рамбулынмæ
хæстæг уыд Наниты Тимур. Тынг сæрæнæй равдыстой сæхи нæ чызджытæ дæр. Гусалты Зæринæ 71 кг онг уæзы цы уæззæуттæ систа, уый бæрц æппæт уæзты архайджытæй сисын никæй бон баци. Афтæ рауад нæлгоймæгты ерысты дæр. Наниты Арсенæй фылдæр дыууæ хуызы ничи систа. Иу ныхасæй, разы стæм нæ спортсменты сæрæн архайдæй æмæ сын арфæ кæнæм, нæ зæрдæтæ нын кæй барухс кодтой, уый фæдыл. Бузныг зæгъæм нæ спортсменты ныййарджытæ æмæ сæ тренертæн! Уырны нæ, æмбæлгæ уавæртæ сын куы уа, уæд сын сæ стырдæр æнтыстдзинæдтæн æвдисæн кæй уыдзыстæм!»
Баскаты Уырызмæг
