Ныр дæс азы дæргъы республикæйы Геронтологон центр хистæр кары адæмæн кæны медицинон лæггæдтæ. Сæ психологон уавæрыл сын дзæбæх ахады.
Рынчынтæн сæ бон вæййы психологон уаты, музыкалон-эстетикон кабинеты, цæххы уæрмы сæ мидунейы æнкъарæнтæ банывыл кæнын. Цыбыр дзырдæй, сæ физикон æнæниздзинад фæхъæддыхдæр кæныныл бацархайынц, цавæрдæр мидхъуырдухæнтæй фервæзын.
Ацы центры сæхи дзæбæх кæнынц сæрмагонд æфсæддон операцийы архайджытæ дæр. Хъыгагæн, æппæт уыцы нæлгоймæгтæн балæггад кæнын центрæн нæма æнтысы, хъæуы сын уæлæмхасæн уавæртæ. Æмæ тагъд хъуа-
мæ ацы кусæндон фæпарахатдæр кæной. Нырмæ уал зæронд бæстыхаймæ базылдысты, хъавынц дзы хæстонтæн реабилита-
цион хайад байгом кæнын, фæлæ сæ зæрдæ дарынц паддзахадон æххуысыл. Бафидыны бындурыл цы лæггæдтæ кæнынц, уыдон фаг сты хи фæдарынæн.
Арф сулæф æмæ сындæггай раулæф… Адæймаджы уд чи фæсабырдæр кæндзæн, ахæм музыкалон сабыр зæлтæ, арты сугты къæр-къæр – уæд алы адæймагæй дæр ферох уыдзысты æппæт тыхстдзинæдтæ дæр. Психологон равдæлды уаты рынчынтæ банкъарынц сæ буар, æнæхъуаджы сæ цы хъуыдытæ тыхсын кæнынц, уыдонæй фервæзынц.
Геронтологон центры рынчынтæн ацы уат у æппæты уарзондæр, уæдæ цæххы уæрм дæр – афтæ. Иннæ сыхаг регионты цæххы ахæм уæрмытæ нæй. Гималайаг цæхх туг байдзаг кæны туаггуырæй, рæуджытæ расыгъдæг кæны рыджы чысыл хæйттæй æмæ тæссаг микроорганизмтæй, уæдæ иммуннон системæйыл дæр хорзæрдæм ахады.
Уыцы лæггæдтæ дзæвгар сты, ноджы Цæгат Ирыстоны уымæл боны-
хъæд нымайгæйæ. Центры уыцы лæггадæн фидын хъæуы, кæй бафæнда, уымæн дзы йæ бон спайда кæнын у. Геронтологон центры исынц алыхуызон æндæр медицинон процедурæтæ дæр. Æппæт процедурæтæ фыст æрцæуынц рæстæгмæ гæсгæ, цæмæй рынчынтæн алцыдæр конд цæуа афойнадыл æмæ æдыхстæй.
Цæмæй æппæт уыцы лæггæдтæ райсай, уый тыххæй бацæуын хъæуы социалон хъахъхъæнынады центрмæ. Уым консультацитæ райсгæйæ, бацæттæ кæндзыстут хъæугæ документтæ. Уый фæстæ уыл ацы Геронтологон центры æхсызгонæй сæмбæл-
дзысты дохтыртæ æмæ медицинон хотæ. Цыдæриддæр сæ дзæбæхгæнæн мадзæлттæ бахъæуы, уый тыххæй ифтонг сты хъæугæ аппараттæй. Магнитотерапийы руаджы бафынæй кæныны уавæртæ фæхуыздæр уыдзысты, уымæй уæлдай магнитотерапи ныхкъуырд дæтты суазалы инфекцион низтæн. Тынг бирæ процедурæтæ кæнынц рынчынтæн, уыдон алкæмæн дæр æвдадзы хос суыдзысты.
Кцойты Тамилæ
