Дзæуджыхъæуы Тхэквондойы спортивон галуаны адæмон спорты хуыз ивазæнтæй (мас-рестлинг) цыдысты РЦИ-Аланийы фыццаг бынат бацахсыныл ерыстæ æрыгæттæ æмæ хистæр кары спортсменты ’хсæн.
Ерыстæ æхсæзæм хатт арæзт æрцыдысты спортивон æхсæнад «Ирон федераци»-йы хъæппæрисæй. Ацы федерацийы активон архайæг Цгъойты Тамерлан сæ сарæзты тыххæй загъта: «Ацы спорты хуызæй Ирыстоны чемпионат аразæм 2018 азæй фæстæмæ. Нæ нысан у нæ рæзгæ фæлтæрты адæмон спорты хуызтæм æнувыддæр кæнын. Æхсызгон у, азæй-азмæ нæ ерысты архайджытæ фылдæр кæй кæнынц, уый. Ивазæнтæй уæлдай ма нæ арæхстджындæрты бæрæг кæнæм чъоппæй ерысты. Ивазæнты тыххæй куы дзурæм, уæд ацы спорты хуыз парахатдæр кæны, куыд Уæрæсейы, афтæ фæсарæнты дæр, æмæ нæ фæнды, цæмæй нæ лæппутæ æмæ чызджытæ уыцы ерысты уой раззагдæртимæ. Хорз уаид, Дзæуджыхъæу æмæ Алагирæй уæлдай ма нæ иннæ районты дæр куы фæзынид ивазæнтæ æмæ чъоппæй цæттæгæнæн секцитæ. Абон федтам не ‘взонг лæппутæ æмæ чызджыты, æрыгон æмæ фæсивæдон кары спортсменты, уыдонимæ нæ хистæр спортсменты архайд, æмæ æхсызгонæй зæгъæн ис, се ’хсæн курдиатджын лæппутæ æмæ чызджытæ бирæ кæй ис, уый.
Нæ ерысты бæрæггонд æрцæудзысты, Уæрæсейы фыццаг бынат бацахсыныл ерысты нæ республикæйы спортивон кад чи хъахъхъæндзæн, уыцы спортсменты нæмттæ. Мах стыр бузныг зæгъæм РЦИ-Аланийы физикон культурæ æмæ спорты министр Хуадонты Артур æмæ спортивон клуб «Олимп»-ы тренер Гæззаты Данæйæн нæ ерыс-
тæ саразынмæ нын цы ‘ххуыс бакодтой, уый тыххæй».
Ивазæнтæй ерысты æппæты кæстæр кары (12-13-аздзыд) 1-аг бы-нæттæ бацахстой: 40 кг – Булацаты Дзамболат, 50 кг – Темырты Константин, 60 кг – Киситы Роберт, 70 кг – Бекмæрзты Альберт.
14-15-аздзыд лæппуты ерысты уæлахиздзаутæ систы: 50 кг – Саид Сафаев, 60 кг – Азамат Сафаев, 70 кг – Годызты Анзор, 80 кг – Гациты Хетæг, 80 кг+ – Тедеты Дзамболат.
Ацы кары чызджыты ’хсæн 1-аг бынæттæ рамбылдтой: 50 кг – Каринæ Саркисянц, 60 кг – Плиты Валерия, 70 кг – Бикъойты София.
16-17-аздзыд чызджыты ‘хсæн 1-аг бынæттæм рацыдысты: 50 кг – Кокойты Эмилия, 60 кг – Сохиты Миланæ, 80 кг – Рæмонты Амандæ.
Сæ карæн лæппутæй 1-аг бынæттæ бацахстой: 60 кг – Хестанты Сæрмæт, 70 кг – Габеты Станислав, 80 кг – Тараты Астемыр, 80 кг+ – Дзусты Артур.
Фæсивæды кары (18-21-аздзыдтæ) – уæлахиздзаутæ систы: 60 кг – Атарбег Чониашвили, 70 кг – Мæргъиты Леуан, 80 кг – Тыбылты Алан, 90 кг – Руслан Верещагин, 105 кг+ – Хуыгаты Георги.
Ас-спортсменты ерысты хистæртæй уæлдай сæ хъару æвзæрстой фæсивæдон кары спортсментæ цалдæрæй. Фыццаг бынæттæм рацыдысты æмæ РЦИ-Аланийы чемпионы нæмттæ рамбылдтой: 60 кг – Арсен Чониашвили, 70 кг – Мæргъиты Леуан, 65 кг – Дзуццаты Цæрай, 75 кг – Цæгæраты Æхсæртæг, 90 кг – Руслан Верещагин, 105 кг – Зозырты Хазби, 105 кг+ – Хъæрæцаты Сæрмæт.
Сылгоймæгтæй Ирыстоны чемпионтæ систы: 55 кг – Вероникæ Сотникова, 75 кг – Илонæ Шапка, 85 кг – Къадзты Зитæ.
Ирыстоны чемпионаты алы уæзы дæр 1-2-аг бынæттæ чи бацахста, уыцы спортсментæ мартъийы хъуамæ архайой Уæрæсейы чемпионаты.
Фæсивæд æмæ кæстæр кары лæппутæ æмæ чызджыты ’хсæн дæр фыццаг дыууæ бынаты бацахсджытæ архайдзысты Уæрæсейы фыццаг бынат бацахсыныл ерысты. Уыдон та апрелы цæудзысты Налцыччы.
Баскаты Уырызмæг
