Дзæуджыхъæуы Социалистон Фæллойы Хъæбатыр, ихсæттæг атомон нау «Арктикæ»-йы капитан Кучиты Юрийы номыл 27-æм астæуккаг скъолайы уыд мадæлон æвзаджы дунеон боны кадæн арæзт литературон-музыкалон бæрæгбон «Кавказ – нæ иумæйаг хæдзар».
Бæрæгбоны уазджытæ уыдысты РЦИ-Аланийы ахуырад æмæ наукæйы министры хæдивæг Дзанайты Марк, ацы министрады национ хайады сæргълæууæг Нæкуысаты Иринæ, Æппæтдунеон æхсæнадон змæлд «Аланты Ныхас»-ы ирон æвзаджы рæзты комитеты сæрдар Бургалаты Заремæ, ацы змæлды Дзæу-
джыхъæуы Промышленнон районы хайады сæрдар Дыгъуызты Алыксандр, Хæлардзинады республикон хæдзары директор Александр Охотников, Дзæуджыхъæуы бынæттон хиуынаффæйады администрацийы ахуырады хайа-
ды минæвар Нартыхъты Лаурæ, скъоладзаутæ æмæ сæ ныййарджытæ.
Фембæлды райдайæны уазджытæн арфæ ракодта скъолайы директор Джимиты Галинæ.
Мадæлон æвзаг зонын æмæ йæ уарзынæн адæймаджы хъуыдыкæнынад æмæ удварны рæзты цы стыр ахадындзинад ис, уый тыххæй æмдзæвгæтæ рухстауджыты хъуыдытæ уазджыты рæгъмæ ирон, уырыссаг, туркаг, азербайджайнаг, францаг, немыцаг æмæ æндæр æвзæгтыл аивæй рахастой скъолайы ахуырдзаутæ Тотыккаты Руслан, Дзиуаты Агуындæ, Текъойты Сослан, Цорæты Дианæ, Плиты Маринæ, Мæргъиты Марк.
Бæрæгбоны фæдыл скъолайы разамынд æмæ ахуырдзаутæ сарæзтой видеобастдзинад æмæ аныхас кодтой дунейы алы рæтты цæрæг ирон адæмы диаспорæты минæвæрттимæ. Сæ алкæй ныхас дæр дзы уыд цыбыр, фæлæ мидисджын æмæ арфæнкъарæнджын.
Уазджыты æмæ фысымты зæрдæтæ йæ музыкалон курдиатæй барухс кодта скъолайы ахуыргæнинаг Даниэль Галустян. Уый гитарæимæ азарыд йæхи музыкæ æмæ ныхæстыл фыст вокалон уацмыс «Мæ мадæлон æвзаг».
Бæрæгбоны кæрон йæ архайджытæ акафыдысты «Симд».
