УФ-йы Федерацийы Советы уæнгтæ æмхъæлæсæй сфидар кодтой «Цæдисон паддзахады иумæйаг æдасдзинады бындурты тыххæй Уæрæсе æмæ Белоруссийы ‘хсæн бадзырды ратификацийы фæдыл» федералон закъон.
Ныр ног закъоны уагæвæрдмæ гæсгæ, алыхуызон тасдзинæдтæ æмæ æндæр æнæнхъæлæджы цаутæ сæвзæргæйæ, Уæрæсейы ядерон тыхтæ хъахъхъæндзысты Белоруссийы æдасдзинад дæр. Уый фæдыл сæрмагонд бадзырд дыууæ бæстæйы президенттæ Владимир Путин æмæ Александр Лукашенко бафыстой 2024 азы декабры.
Уыцы æууæлтæм сенаторты æргом раздæхта Федерацийы Советы уæнг Цæгат Ирыстонæй, хъахъхъæнынад æмæ æдасдзинады комитеты уæнг Мамсыраты Таймураз, закъоны проектыл дзургæйæ. Сенаторы ныхасмæ гæсгæ, амынд бадзырдæн ис æрмæстдæр хъахъхъæнынадон нысаниуæг, æндæр бæстæтæ æмæ иугæндты бартæ æппындæр ницы хуызы къахыр кæны.
Мамсыры-фырт куыд фæбæрæг кодта, афтæмæй бадзырды бæлвырд фидаргонд æрцыдысты Уæрæсе æмæ Белоруссийы цæдисон паддзахады иумæйаг æдасдзинад æмæ хъахъхъæнынадон политикæйы бындуртæ.
«Нæ бæстæйы разамынд иу æмæ дыууæ хатты нæ бахатыд ныгуылæйнаг паддзахæдтæ æмæ НАТО-йы разамындмæ, цæмæй иумæйаг хъарутæй бакусæм Европæйы æдасдзинады фарстатыл. Уыцы хъæппæрисæн дзуапп раттыны бæсты ныгуылæйнаг бæстæтæ Уæрæсейы арæнтæм ‘ввахс бынæтты фæкарздæр кодтой сæ сгарæн æмæ æфсæддон архайд. Финлянди æмæ Швеци дæр цыбыр
рæстæгмæ систы НАТО-йы уæнгтæ. Уыцы æмæ иннæ æууæлтæ Уæрæсе æмæ йæ хæстæгдæр цæдисон – Белоруссийы размæ сæвæрдтой фарста иумæйаг æдасдзинадæн уæлæмхасæн ахадгæ мадзæлттæ саразыны тыххæй. Афтæ фæзынд амынд бадзырд», – загъта Мамсыраты Таймураз.
Бадзырды æмгъуыд у 10 азы, йæ тыхы бацæудзæн, дыууæ бæстæйы парламенттæ ратификацийы фæдыл æппæт гæхæттытæ куы сфидар кæной, уæд.
Фаризæ ХАДАШЕВА
