Цæгат Ирыстоны профилон ведомствæтæ цы федералон программæты уагæвæрдтыл кусынц, уыдонæй иу у «Хистæр фæлтæр».
Ацы программæйы сæйрагдæр нысан у хистæр фæлтæры минæвæртты цард æнцондæр æмæ цымыдисагдæр кæнын, алыхуызон социалон лæггæдтæ сын кæнын. Прог-раммæйы фæзилæнтæй иу у социалон туризм. Ацы мадзалы фæрцы пенсиисджытæ æмæ сахъат адæмы ахонынц алыхуызон бæс-тæзонæн æмæ рухстауæн балцытæм Цæгат Ирыстон æмæ сыхаг регионты зæрдылдарæн бынæттæм.
Ахæм экскурситæй хис-тæр фæлтæры минæвæрттæ алкæддæр разыйæ баззайынц. Æмæ куыннæ – бабæрæг кæнынц ног бынæттæ, базонынц бирæ цымыдисаг хабæрттæ. «Кæй зæгъын æй хъæуы, ацæргæ адæймаджы фæрныг цард бирæ аразгæ у хæрзхъæд медицинон æмæ æндæр социалон лæггæдтæй. Уыимæ, ахсджиаг у, цæмæй пенсиисæг иппæрд ма уа æхсæнады цардæй, фадæттæ йын уа бæстæзонæн балцытæ æмæ йе ’мгæрттимæ зæрдиаг фембæлдтытæн. Уыцы нысантæн ахъаз сты программæ «Хистæр фæлтæр»-ы мадзæлттæ», – загъд ис РЦИ-Аланийы Фæллой æмæ социалон рæзты министрады пресс-службæйы хъусынгæнинаджы.
Ведомствæйы минæвар куыд фæбæрæг кодта, афтæмæй 2024 азы хистæр фæлтæры минæвæрттæн сарæзтой 88 алыхуызон туристон балцы, сæ архайæг та систы 1,6 мин адæймагæй фылдæр.
Уыимæ, министрады минæвары ныхасмæ гæсгæ, уыцы куыст ацы азы адарддæр уыдзæн.
КАЛМАНТЫ Аслан
