Цытджын ирон поэт, нывгæнæг æмæ æхсæнадон архайæг Хетæгкаты
Къостайы кадæн дзæуджыхъæуккаг скъоладзауты ‘хсæн Хетæджы-фырты номарæн хæдзар-музейы ацыдысты поэты сфæлдыстады темæйыл ерыстæ.
Дзыллон мадзалæн фадæттæ сарæзтой регионы Национ политикæйы министрад, Хæлардзинады хæдзар, бæстæйы Æфсæддон-патриотон æхсæнады республикон
хайад æмæ амынд хæдзар-музей.
Ерысты архайджытæн арфæ кæнгæйæ, Хæлардзинады хæдзары директор Александр Охотников бафиппайдта зындгонд поэты сфæлдыстады ахадындзинад.
Ерысты жюрийы уæнгтæ – Дзæуджыхъæуы администрацийы адæмыхæттыты ‘хсæн ахастдзинæдты райрæзты хайады хицау Дарчиты Зæринæ, Хетæгкаты Къостайы хæ-
дзар-музейы разамонæг Атараты Зæлинæ, Хæлардзинады хæдзары хистæр специалист Николай Левченко, сывæллæтты аивадон скъолайы ахуыргæнæг Санситы Мæдинæ æмæ жюрийы сæрдар, сывæллæтты журнал «Ногдзау»-ы сæйраг редактор Сæлбиты Дианæ – скъоладзауты лæвæрд дзуаппытæн аргъ кодтой.
Кары алы къордты уæлахиздзаутæ – Дзæуджыхъæуы 3-æм æмæ 38-æм скъолаты (директортæ – Хъæрджынты Таймураз æмæ Сланты Мæдинæ), стæй физикон-математикон лицейы (директор – Франкель Магомедов) командæтæ «Хуры сывæллæттæ», «Фидæн» æмæ «Ног фæлтæр» – хорзæхджын æрцыдысты республикæйы Национ музей æмæ Хæлардзинады хæдзары грамотæтæй, стæй журнал «Ногдзау»-ы радон номыртæй.
Ерысты архайæг сывæллæттæ Хетæджы-фырты цард æмæ сфæлдыстады тыххæй бирæ цымыдисаг хабæрттæ базыдтой. Скъоладзаутæ сæ зонындзинæдтæ дарддæр фылдæр кæныныл кæй архайдзысты, ууыл зæрдæ дарæн ис.
Хъайтыхъты Тамарæ
