Ацы бонты æххæстгонд цæуынц зиуты æппæтуæрæсеон акци «Сыгъдæгдзинады сæраппонд»-ы мадзæлттæ. Уыцы акцийы зæрдиагæй архайынц Цæгат Ирыстоны фæсивæдон организацитæ дæр.
Афтæ, РЦИ-Аланийы Фæсивæды хъуыддæгты фæдыл комитеты кусджытæ ведомствæйы дæлбар организациты минæвæрттимæ сыгъдæгдзинады дзыллон зиу сарæзтой мемориалон комплекс «Барбашовы быдыр»-ы. Акцийы архайдтой уæлдæр æмæ астæуккаг ахуырады кусæндæтты минæвæрттæ дæр. Фæсивæд бафснайдтой комплексы фæзуат, алыхуызон быронæй асыгъдæг кодтой номарæн бынаты алфамбылай.
«Зиу нæ иумæйаг рагон æгъдау у. Ахæм мадзæлттæ мах алкæддæр æрбангом кæнынц, дæттынц нын фадат пайдайаг хъуыддаг саразынæн, æрдзыл аудынад равдисынæн», – æмхъуыды уыдысты зиууæттæ.
Уыцы бон сæ зæрдиаг архайдæй бæрæг дардтой Фæсивæды социализаци æмæ Æфсæддон-патриотон хъомылады центрты, студи «Амран»-ы, ахуырадон центр «Интеллект»-ы, Цæгат Кавказы хæххон-металлургон институты, Хæххон паддзахадон аграрон университеты, Цæгат Ирыстоны таможняйы фæсивæдон совет æмæ иннæ организациты æрвыст къордтæ.
Æппæтуæрæсеон акци «Сыгъдæгдзинады сæраппонд» арæзт цæуы Фыдыбæстæйы Стыр хæсты Уæлахизы 80 азы æмæ Фыдыбæстæ хъахъхъæнæджы азы кадæн. Йæ сæйрагдæр нысантæ сты: æхсæнады историон-культурон удварнон хъомыс фидардæр кæнын, фæсивæды хистæр фæлтæрты фарныл æфтауын, хæсты архайджыты æфсымæрон ингæнтæ æмæ иннæ номарæн комплекстæ æмæ цыртдзæвæнтæм зилын….
КАЛМАНТЫ Аслан
