Ацы къуыри у регионалон программæ «Доблесть Осетии»-йы архайджыты æвзарыны кæронбæттæн къæпхæн, ахæсдзæн 16 маймæ. Программæйы Æхсæнадон советы уæнг, республикæйы муниципалон скондты советы сæрдар æмæ Кировы районы сæргълæууæг Нæкуысаты Барисы хъуыдымæ гæсгæ, Фыдыбæстæйыл иузæрдион, æцæг патриоттæ, æнæцудгæ, ныфсджын – уыдон хъахъхъæнынц абон Уæрæсе, ахæм адæймæгтæ хъæуынц нæ царды алыхуызон къабæзты.
– Республикæйы Сæргълæууæг Сергей Меняйло кæй расидт æмæ царды цы кадрты ног программæ арæзт цæуы, уый фæахъаз уыдзæн сæрмагонд æфсæддон операцийы архайджытæ æмæ ветерантæн ног дæсныйæдтыл сахуыр кæнын æмæ куыст ссарынæн. Сæрмагонд æфсæддон операцийы архайджытæ æмæ ветерантæн ацы проект хицæн у, йæ сæйраг хæс – граждайнаг царды хæстонтæн ногæй хи ссарынæн баххуыс кæнын. Сæ алкæмæн дæр фадат ис, Райгуырæн бæстæ, неофашисттæй хъахъхъæнгæйæ, сæхи куыд равдыстой, афтæ архайын сабыр царды дæр. Ахсджиаг хъæугæ хъæппæрис у, цæмæй, нæ бæстæ удуæлдайæ чи хъахъхъæны, уыдон ын дарддæр дæр службæ кæной, æрмæст ныр – кæм цæрынц, уым, сæ ныййарæг зæххыл. Ахæм адæймæгтæ сты фæзминаг, уыдон хъуамæ уой регионалон æмæ муниципалон хицаудзинады оргæнты, æхсæнадон организациты, бизнес – структурæты.
Цы дæтты йæ архайджытæн программæ «Доблесть Осетии»? Стыр ахуыргæнæн курс у, ис дзы æппæт дæр хи æмæ профессион рæзтæн. Ахуырадон курс саразыныл бакуыстой РАНХиГС-ы управленийы Уæлдæр паддзахадон скъолайы хуыздæр специалисттæ, стæй АНО «Россия – страна возможностей», нæ республикæйы йæ æххæст кæны регионы Сæргълæууæг æмæ Хицауады администраци. Йæ фыццаг къæпхæн фæцис 30 мартъийы, æмæ разыйæ баззадтæн, 400 архайæджы дзы регистрацигонд кæй æрцыд, уымæй. Дарддæр та, 1 июльмæ йæ архайджытæ ацæудзысты тесттæ, семæ цæудзæн ныхас. Хатдзæгтæм гæсгæ профессион эксперттæ аргъ скæндзысты, æмæ сбæрæг уыдзысты фæуæлахизуæвджытæ. Нымады цæуынц программæйы архайджытæн сæ хæстон сгуыхтдзинæдтæ, разамонæджы фæлтæрддзинад сæм кæд ис, уæд уый, сæ адæймагдзинады миниуджытæ æмæ размæ цæуынмæ тырнындзинад. Уæлахиздзаутæ ацæудзысты, цалдæр модулæй арæзт чи у, ахæм тыхджын ахуырадон курс.
Иу ныхасæй, уый хуымæтæджы кадртæ уадзæг хъæппæрис нæу, Ирыстоны рæзтмæ стыр бавæрæн бахæссынмæ цæттæ чи у, уыдоны фидæны архайдæн у йæ бындур. Уырны мæ, сæрмагонд æфсæддон операцийы архайджытæ æмæ ветерантæн ацы проект кæй суыдзæн ног бæрзæндмæ схизынæн къахдзæф æмæ ног хъуыддæгтыл бакусыны фæрæз, – зæгъы Нæкуысаты Барис.
Æрмæг бацæттæ кодта
ХУЫБИАТЫ Ларисæ
