Цæгат æмæ Хуссар Ирыстоны, нæ бæстæйы литературон сфæлдыстадон æхсæнады сæдæгай чиныгкæсджыты фæлтæртæн зонгæ æмæ уарзон у нæ республикæйы Фысджыты цæдисы раздæры сæрдар, адæмон поэт, Хетæгкаты Къостайы номыл паддзахадон премийы лауреат, Цæгат Ирыстоны паддзахадон гимны ныхæсты автор, тæлмацгæнæг æмæ æхсæнадон архайæг Ходы Камалы ном. Цалдæр азы размæ йæ цардæй кæд ахицæн, уæддæр йе сфæлдыстад æмæ йæ ном кад æмæ радимæ цæрынц æмæ цæр-
дзысты адæмы ‘хсæн.
Æрæджы Дзæуджыхъæуы рауагъдад «Веста»-йы мыхуыры рацыд чиныг – фотоальбом «Ходы Камалы цардвæндаг». Бацæттæ йæ кодта йæ бинойнаг Ходы Валентинæ. Арæзт у зындгонд æмæ курдиатджын поэт, тæлмацгæнæг Ходы Камалы биографион æмæ библиографион æрмæджытæй æмæ йæ цард, бирæвæрсыг сфæлдыстадон æмæ æхсæнадон цардыл дзурæг алы азты ист къамтæй. Йæ райдайæны ис Камалы цард æмæ сфæлдыстадон архайды сæйрагдæр æмæ зæрдылдаринагдæр цауты бæлвырд æрфыст. Алы азты фыст æмдзæвгæтæн сæ хуыздæртæ та æххæстдæрæй æвдисынц чиныг-фотоальбомы мидисамад æмæ иумæйагæй æрмæджыты хъуыды.
Алы рæстæджыты зындгонд поэт, тæлмацгæнæг æмæ æхсæнадон архайæг Ходы Камалы тыххæй нæ зындгонд политиктæ, литературæ æмæ аивады архай-
джытæй Галазты Æхсарбег, Дзасохты Алыксандр æмæ Музафер, Бедойты Шалва æмæ Джыккайты Шамил æмæ, иннæтæ цы загътой, уыцы раныхæстæй скъуыддзæгтæ дæр сæхимæ аздахдзысты чиныгкæсæджы æргом.
Чиныг-фотоальбомы сты, алы рæстæджыты нæ зындгонд фысджытæ, ахуыргæндтæ æмæ артисттыл Ходы Камал цы уацтæ ныффыста, уыдонæн сæ мидисджындæр
скъуыддзæгтæ. Куыд литературон критик, афтæ та йæ цæстуарзон, æргом æмæ барджын ныхас загъта Хетæгкаты Къоста, Плиты Хадо, Цæрукъаты Алыксандр, Хъайтыхъты Азæмæт, Дзаболаты Хазби, Джусойты Нафи, Хостыхъоты Зинæ, Джыккайты Шамил, Дауыраты Дамир æмæ Уататы Бибойы цард æмæ удуæлдай сфæлдыстадон архайдыл.
Нæ бæстæ, Цæгат æмæ Хуссар Ирыстоны литературон æмæ æхсæнадон царды разæнгардæй кæй архайдта, литературæ æмæ мадæлон æвзаджы сомбоныл, кæстæрты удварны рæзтыл зæрдæйæ кæй тыхст, уый ирдæй зыны, алы азты Уæрæсе æмæ Цæгат Ирыстоны газеттæ æмæ литературон журналты редакциты уацхæсджытæн цы интервьютæ фæлæвæрдта, уыдоны мидисæй. Сæ хуыздæртæ сын автор Ходы Валентинæ хæссы нæ размæ йæ чиныг-фотоальбомы.
Чиныг-фотоальбом «Ходы Камалы цардвæндаг» хорз сфидыдта курдиатджын поэт æмæ тæлмацгæнæджы цард æмæ сфæлдыстадимæ баст мысинæгтæ æмæ хъæлдзæг, цыргъзонд хабæрттæй.
Ног чиныг-фотоальбом «Ходы Камалы цардвæндаг» хорз æххуыс уыдзæн сæ зонадон æмæ рухстауæн архайды, удварны иумæйаг рæзты нæ ахуыргæндтæ, аспиранттæ, студенттæ, ахуыргæнджытæ æмæ скъоладзаутæн, ирон аив дзырд чи уарзы, уыцы адæмы алы фæлтæртæн.
ГАСАНТЫ Валери,
Хетæгкаты Къостайы номыл Ирон литературæйы музейы
хистæр зонадон кусæг
