Уæлдæр ахуырады къабазæн йæ размæ абон цы фарстатæ лæууы, царды абон тынгдæр чи хъæуы, ахæм дæсны специалисттæ цæттæ кæныны хъуыддаг куыд рацаразын хъæуы, наукæ æмæ цард кæрæдзимæ цæмæй æрбаввахсдæр уой, уый тыххæй цы саразын хъæуы – ацы æмæ æндæр фарстытæн дзуаппытæ ссарыны нысанимæ знон уыд парламентон байхъуыстытæ «Республикæ Цæгат Ирыстон-Аланийы уæлдæр ахуырады къабаз райрæзын кæнын», зæгъгæ, ахæм темæйыл. Байхъуыстытæ саразæг – Парламенты наукæ, ахуырад, культурæ æмæ информацион политикæйы комитет.
Æмбырд райдайыны размæ Парламенты фойейы арæзт æрцыд равдыст. Нæ республикæйы уæлдæр ахуыргæнæндæттæ равдыстой, наукæ, наукон архайд, инновацион æмæ нано-технологитæ экономикæйы къабазмæ цы бавæрæн хæссынц, æмæ уыцы бавæрæны охыл уæлдæр ахуыргæнæндæтты абон цы наукон куыст цæуы, стæй сæм уыцы хъуыддаджы цавæр æнтыстытæ ис, уый.
Æмбырды райдайæны йæ архайджытæн арфæ ракодта Парламенты Сæрдар
Тускъаты Таймураз æмæ раныхас кодта, нæ бæстæйы наукæйы райрæзты историйы цы ахсджиаг цаутæ уыд æмæ йæ райрæзты цы къæпхæнтыл ацыд, ууыл.
– Ахуырады къабаз цæмæй ноджы бæрзонддæр сисæм, уый тыххæй рох кæнын нæ хъæуы ивгъуыд дуджы фæлтæрддзинад, – загъта Парламенты Сæрдар. Стæй ма бафиппайдта, равдыстыты кæй федта, æрыгон ахуыргæндты уыцы наукон архайды фæстиуджытæ республикæйы адæмон хæдзарад размæ ракæнынæн ахъаз кæй уыдзысты, уый.
Ивгъуыд дуджы фæлтæрддзинадмæ æргом аздахыныл, хорзæй дзы цы уыд, уымæй абон пайда кæныныл ныхас кодта Парламенты профилон комитеты сæрдар Еленæ Князева. Уый бафиппайдта, республикæйы районты, горæт Дзæуджыхъæуы дæр ахуыргæнджытæ фаг кæй нæй, уыцы фарстайы ахсджиагдзинад æмæ загъта, программæ «Приоритет-2030» фарста алыг кæнынæн кæй фæахъаз уыдзæн.
Республикæйы ахуырад æмæ наукæйы министры хæдивæг Габеты Вадим ныхас кодта Цæгат Ирыстоны ахуырады къабазы хъæздыг историйыл, йæ абон æмæ йæ фидæныл. Куыд загъта, афтæмæй республикæйы ис æхсæз уæлдæр ахуыргæнæндоны, уым ахуыр кæнынц 22 мин студентæй фылдæр. Астæуккаг профессионалон ахуыргæнæндæтты студентты нымæц та у 4 минæй фылдæр. Уыдонæй сæ равзæрст дæсныйадыл кусын райдайы æрмæстдæр сæ 67 проценты бæрц, фæлæ уый бынтон зæрдæмæдзæугæ нымæц нæу. Хъуыддаг банывыл кæн-дзæн, Тускъаты Таймуразы ныхасмæ гæсгæ, профориентацион куыст, æмæ йæ ахуырдзауты ‘хсæн райдайын хъæуы цас раздæр, уымæй хуыздæр.
Ахуырады къабаз райрæзын кæныны нысантыл, уæлдæр ахуырады хæрзхъæддзинадыл, уæлдæр ахуыргæнæндæтты наукон, ахуырадон æмæ хъомыладон куыст æмæ æндæр фарстатыл ныхас кодтой æмбырды архайджытæ: Цæгат Кавказы хæххон-металлургон институты (паддзахадон технологон университеты) ректор Хъамболты Дзамболат, Цæгат Ирыстоны Хетæгкаты Къостайы номыл паддзахадон университеты ахуырадон архайды фæдыл проректор Тенгиз Тиникашвили, Хæххон паддзахадон аграрон университеты ахуырадон куысты фæдыл проректор Фидараты Светланæ, Цæгат Ирыстоны паддзахадон медицинон академийы æнæниздзинад хъахъхъæнынады регионалон рæзт æмæ наукон-иртасæн куысты фæдыл проректор Дзгойты Мæдинæ, Дзæуджыхъæуы наукон центры наукон-организацион æмæ ахуырадон архайды фæдыл директоры хæдивæг Верæ Абатурова, Республикæ Цæгат Ирыстон-Аланийы Профессион цæттæдзинады центры разамонæг Кучиты Батрадз æмæ иннæтæ.
Æппæт раныхæсты фæдыл парламентон байхъуыстыты архайджытæ загътой сæ фиппаинæгтæ æмæ рахастой комкоммæ амынддзинæдтæ республикæйы Парламентæн, Хицауадæн, Ахуырад æмæ наукæйы министрадæн, республикæйы æппæт уæлдæр ахуыргæнæндæттæн, бынæттон хиуынаффæйады администрацитæн.
ДЕДЕГКАТЫ Зæлинæ,
Къам систа Татьянæ Шеходанова
