Ацы аз у Уæлахизы 80 азы бæрæгбоны аз. Æз мæхæдæг хауын хæсты сывæллæтты къордмæ. Немыцæгты федтон. Сæ иу афицерæн ма йæ мыггаг дæр хъуыды кæнын: Хуперт.
Иу рæстæджы архайдтон, хæсты чи уыдис ирон дохтыртæй, уыдонæн ном-
арæн комплекс скæныныл Мединституты кæрты. Ууыл кусгæйæ, базонгæ дæн Реуазты Алыксандры чызг Верæимæ. Уый хæстæн йæ райдайæнæй йæ кæронмæ фæци тохы быдыры, уыдис медицинон хо. Бирæ цæф æфсæддонты, зæгъын æмбæлы, скъахта мæлæты дзæмбытæй. Цыртдзæвæныл куыд куыстон, уый йæм не ’вдыстон, йæхи портрет ын кодтон. Мраморæй йæ сарæзтон. Ныртæккæ ис музейы, æфснайæны æхгæдæй лæууы. Растдæр та уаид, уæлдайдæр ацы аз, Уæлахизы 80 азы бæрæгбоны аз, æвæрд куы æрцæуид 1-æм поликлиникæйы бацæуæны, кæнæ та медколледжы кæрты.
Верæ ма мын бирæ диссæгтæ фæдзырдта. Æппæтæй диссагдæр та уыд иу: цæфтæ, тугамæст танкисты санчастмæ куы баласта, уый. Дохтыртæ йæ райстой, архайынц ыл, Верæйæн та гыццыл улæфты рæстæг уыд исты саходынмæ. Иу рæстæг æм дохтыртæй иу бауадис, радзырдта йын, цы цæф танкисты æрбаластой, уый, дам, цымæ, кæцы адæмыхаттæй у, цавæрдæр æвзагыл, дам, Гитлеры æлгъиты. Верæ йæ хæрд фæуагъта, базгъордта йæм.
Сыгъдæг иронау æлгъиты Гитлеры, мæ куыдз дыл афтæ, мæ хæрæг дыл афтæ, зæгъгæ. Верæ йæ ныхъхъæбыс кодта, ай ирон куы у, зæгъгæ, ме ’фсымæр уыдзæн абонæй фæстæмæ. Уый та разынд Саламты Къола, фидæны нæ бæстæйы адæмон артист, Станиславскийы номыл премийы лауреат чи сси, уый.
Реуазты Верæйы фигурæ, Медакадемийы цы цыртдзæвæн скодтон, уым ис, цæф салдаты куыд хоны, афтæ æвдыстæй. Ногæй ма йæ зæгъын, Верæйы сурæт хъуамæ музейы æхгæдæй ма лæууа, фæлæ ацы аз хъуамæ æвæрд æрцæуа кæнæ 1-æм поликлиникæйы, кæнæ та медколледжы кæрты! Гом та йæ хъуамæ бакæной бæрæгбоны хуызы! Уый уыдзæн тынг раст. Фæсивæд дæр, уый уынгæйæ, растдæр фæндагыл цæудзысты! Афтæ уæд!
ДЗБОЙТЫ Михал, Уæрæсейы
сгуыхт нывгæнæг
