Сæрмагонд æфсæддон операци æххæст кæныны тæлмы чи фæмард, бæстæйы Национ гвардийы æфсæдты федералон службæйы цæгатирыстойнаг управленийы хицау, пъæлицæйы инæлар-майор Валерий Голота уыцы афицер Гæздæнты Аланы фыд Валерийæн радта йæ фырты майдан «Ирыстоны намысæн».
– Зианджын адæймаджы рис чи фæкъаддæр кæна, ахæм дзырдтæ ссарын зын у. Нæ бинонтæн иудадзыг æххуысгæнæг Национ гвардийы æфсæдты республикон управленийæн – бузныг. Бахъуаджы заман уæм мах дæр фæкæсдзыстæм, – загъта афицеры фыд.
2008 азы Алагиры районы Дзуарыхъæуæй рацæуæг Алан ссис Уæрæсейы Мидхъуыддæгты министрады бетъырбухаг æфсæддон институты курсант. Ацы ахуыргæнæндон каст фæуыны фæстæ лæппу службæ кодта Цæгат Кавказы территорийыл бæрнон бынæтты, терроризмы ныхмæ операциты архайгæйæ, Алан равдыста хъæбатырдзинад æмæ удуæлдайдзинад.
2022 азы 31 декабры æрыгон афицер нæ адæмы райдзаст фидæны сæраппонд æвирхъауæй фæмард.
Амæй размæ Аланы схорзæхджын кодтой Жуковы майданæй (йæ амæлæты фæстæ).
Уф-йы Национ гвардийы æфсæдты федералон службæйы РЦИ-Аланийы управленийы пресс-службæ
