Дард Хурыскæсæны Сахалины облæсты сæйраг горæт Южно-Сахалинскы ивгъуыд къуыри уæззау атлетикæйæ цыдысты Уæрæсейы фыццаг бынат бацахсыныл ерыстæ фæсивæды (23 азы онг) ’хсæн. Уæрæсейы тыхджындæр уæззæуттæисæг фæсивæд бæрæггонд цыдысты нæлгоймæгтæ æмæ сылгоймæгты ’хсæн.
Нæ газеты сабаты номыры фыстам, чызджыты ерысты нæ сæрæн æмзæххонтæ Анастасия Черемных æмæ Челæхсаты Мæдинæйы архайд куыд рауад, уый тыххæй. Анастасия 49 кг онг уæзы бацахста 3-аг бынат, Мæдинæ та 76 кг онг уæзы ссис ерысты уæлахиздзау.
Нæ чызджыты бафæзмыдтой нæ лæппулæгтæ дæр, æмæ сын бантыст сыгъзæрин æмæ бронзæ майдантæ рамбулын.
Тренер Æлборты Русланы хъомылгæнинаг Мæрзойты Георги 96 кг онг уæзы хæстæг уыд 2-аг бынат бацахсынмæ, фæлæ йын уый нал бантыст, æмæ рацыд 3-аг бынатмæ. Георги дыууæ хуызы систа 336 кг (151+185).
109 кг онг уæзы æнæкъуыхцы рауад Уæрæсейы сгуыхт тренер Золойты Хъазыбеджы хъомылгæнинаг Теблойты Сæрмæты архайд. Сæрмæт ерысты фыццаг хуызæй 174 кг уæзон штангæ уыцы иу ист куы скодта, уæд йæ ныхмæлæуджытæй уый бæрц никæмæн бантыст. Ерысты дыккаг хуызы Сæрмæт йæ фыццаг фæлварæны йæ риуæй сысхуыста 190 кг æмæ, дыууæ хуызы 364 кг куы равдыста, уæд уый бæрц йæ фæстæ ничиуал систа, æмæ Теблойы-фырт ссис ерысты уæлахиздзау.
Баскаты Уырызмæг
