Хъуыды-иу кодтон, дис кодтон, алантæ сæ символæн фыранк цæмæн равзæрстой, нæ гербыл йæ сурæт цæмæн ис?
Иу рæстæджы Терчы был хидыхъусы фыранчы скульптурæтыл куы
куыстон, уæд ыл, цыдæриддæр фыст ссардтон, уыдон фæкастæн: фыранк сырдтæн сæ стырдæр нæу, донбай, тигр бирæ стырдæр сты, фæлæ фыранк та се ’ппæтæй ныфсджындæр, хиндæр, зондджындæр у. Фæстæмæ алидза йæ ныхмæлæууæгæй, ахæм уавæр нæй йæ царды. Сæгуытыл цуангæнгæйæ, ахæм хабар бакастæн: бæрзонд хæхты хурварс бæрзонд кæрдæгыл хизы сæгуытты дзуг. Фыранк, дымгæ кæцы ’рдыгæй кодта, уым уыны сæгуытты æмæ уымæй дæлдæр арф кæрдæджы схуыссыд, йæ къæхтæ фæйнæрдæм айтыхта. Сæгуыттæ йæ хизгæ-хизын нæ бафиппайдтой, йæ раззаг æмæ фæстаг къæхты ‘хсæн кæрдæг тонынц. Уыцы рæстæг фыранк ацахсы сæгуыты. Ахæм диссаг ма уа! Фæлæ мæм диссагдæр та уый кæсы, æмæ нæ рагфыдæлтæ куыд базыдтой йæ уыцы миниуджытæ. Алантæн сæхимæ дæр уыцы миниуджытæй бирæ ис.
1942 азы И.В. Сталин фыста Хъулаты Хъуыбадымæ: «Æз зонын ирон адæмы (алантæ), уыдон никуы никæй раз æрлæууыдысты сæ уæрджытыл».
Мах хъуамæ нæ рагон историйæ сæрыстыр уæм æмæ йæ дарддæр дæр хæццæ кæнæм!
ДЗБОЙТЫ Михал,Уæрæсейы Федерацийы сгуыхт нывгæнæг
