РЦИ-Аланийы Сæргълæууæг Сергей МЕНЯЙЛОЙЫ разамындæй уыд регионалон программæ «Æхсарджын Ирыстон» æххæст кæнынмæ цæстдарæг æхсæнадон советы æмбырд. Фембæлды архайджытæ сбæлвырд кодтой амынд программæйы кæронбæттæн ахуырты архайджыты номхыгъд.
Советы уæнгтæ бæстон бахыгътой, программæйы архайынвæнд чи скодта, уыцы кандидаттæ тесттæ æмæ æндæр фæлварæнтæ куыд раттой, æвзарæн къæпхæнтыл цы зонындзинæдтæ æмæ фæлтæрд-дзинад равдыстой, уый. Афтæмæй æппæт экспертон бæрæггæнæнты бындурыл равзæрстой программæйы кæронбæттæн къæпхæны архайджыты.
Сергей Меняйлойы ныхасмæ гæсгæ, кæронбæттæн хатдзæгтæ кæнгæйæ,
бæстон каст цыд кандидатты хæстон сгуыхтдзинæдтæм, сæ профессион зонындзинæдтæ æмæ куыстадон фæлтæрддзинадмæ, сæ удыхъæды миниуджытæ æмæ æндæр æууæлтæм.
– Программæ «Æхсарджын Ирыстон» арæзт у сæрмагонд æфсæддон операцийы архайджытæн. Уыцы æфсæддон службæгæнджытæй программæйы кæронбæттæны архайæг чи суа, уыдонæн августы райдайдзысты сæрмагонд ахуырадон семинартæ.
Ахуыртæ амондзысты хицаудзинады паддзахадон æмæ муниципалон оргæнты фæлтæрдджындæр кусджытæ, профессион цæттæдзинад бæрзонддæр кæныны федералон æмæ регионалон центрты специалисттæ, зындгонд эксперттæ. Ахуыртæ æнтыстджынæй чи ахицæн кæна, программæйы уыцы архайджытæн фидæны уыдзæн сæ профессион дæсныдзинад æмæ зонындзинæдтæ хицаудзинады регионалон æмæ муниципалон оргæнты, стæй æхсæнадон организациты куысты равдисыны фадат, – бафиппайдта республикæйы Сæргълæууæг.
«Æхсарджын Ирыстон»-ы архайыны фæдыл курдиæттæ балæвæрдтой 385 адæймаджы. Уыдонæй фыццаг къæпхæныл æвзæрст æрцыдысты 157 кандидаты. Дарддæр программæйы æхсæнадон совет куыста уыцы адæмы курдиæттимæ. Кандидаттимæ фембæлгæйæ æмæ сæрмагонд тесттæ æмæ æндæр фæлварæнтæ саразгæйæ, æхсæнадон советы уæнгтæ равзæрстой программæйы кæронбæттæны архайæг 32 адæйма-джы. Уыдон иууылдæр сты Цæгат Ирыстоны цæрджытæ, ис сæм уæлдæр профессион ахуырад. Кандидаттæй æппæты хистæрыл цæуы 52 азы, æппæты кæс-тæрыл та – 24 азы.
Зындгонд куыд у, афтæмæй нысанмæ арæзт регионалон программæ «Æхсарджын Ирыстон» йæ тыхы бацыд 2025 азы райдайæны. Йæ сæйрагдæр нысантæ сты сæрмагонд æфсæддон операцийы раздæры архайджыты профессион рæзтæн фадæттæ аразын, хицаудзинады регионалон æмæ муниципалон оргæнтæ æмæ æхсæнадон иугæндтæн разамонæг кадртæ цæттæ кæнын.
КАЛМАНТЫ Аслан
