Цæгат Ирыстоны хъæууон хæдзарады фæллойгæнджытæ ацы бонты æфснайынц фæззыгæнд хортæ. 2025 азы тыллæгæн регионы байтыдтой 39,6 мин гектарæй фылдæр фæззыгæнд æфсирджын хортæ æмæ 11,4 мин гектары бæрц – фæззыгæнд рапс. Æдæппæтæй регионы фæзуаты хъуамæ æфснайд æрцæуа 51,1 гектары.
Фæбæрæг кæнын хъæуы, цы мыггаг байтыдтой, уыдоны фылдæр хай уæрæсейаг кæй уыдысты – агропромышленнон комплексы кусджытæ архайынц хи гæнæнты райрæзтыл национ проект «Хæлцы æдасдзинады технологион æфсисад»-ы фæлгæты.
Нæ республикæйы хорæфснайæн кампани райдайы Мæздæджы районы. Æмæ та ацы сæрд дæр æфсирджын хортæ æфснайынмæ фыццаг бавнæлдтой мæздæггæгтæ. Куыстытæ ацы районы куыд цæуынц, уымæ лæмбынæг æркаст Цæгат Ирыстоны хъæу-
уон хæдзарады министры хæдивæг Къадзаты Игорь йæ кусæг балцы
рæстæг.
Къадзайы-фырт куыд фæбæрæг кодта, афтæмæй регионы хъæууонхæдзарадон куыстуæттæ хорæфснайæн куыстытæм цæттæ сты. Фæззыгæнд хорты уавæр хорз у, хъæугæ æфснайæн техникæмæ рагагъоммæ базылдысты. Министры хæдивæг куыд зæгъы, афтæмæй хортæ цыбыр рæстæгмæ бафснайын бантысдзæн, æрдзон уавæртæ климæтмæ æнæнхъæлæджы ивддзинæдтæ куы нæ бахæссой, уæд. Бæрæггонд куыд у, афтæмæй иу гектарæй ист цæуы 43,9 центнеры.
Рæстæмбис нымадæй, регионы тыллæгæрзад уыдзæн иу гектарæй 40–45 центнеры. Уыцы нымæцтæ дзурæг сты Ирыстоны быдырты гæнæнтæ æмæ Цæгат Кавказы регионты бавæрд Уæрæсейы хъæууон хæдзарады зæххы куыст æмæ нæ бæстæйы хæлцон хæдбарадмæ.
ГАПБАТЫ Алетæ
