Хуссар Ирыстоны Фæллой æмæ социалон хъахъхъæнынады министрады бæрнон кусджыты делегаци балцы уыд Цæгат Ирыстоны. Уый тыххæй фехъусын кодта РЦИ-Аланийы Фæллой æмæ социалон рæзты министрады пресс-службæ.
Хуссарирыстойнаг делегацийы уæнгтæн цалдæр фембæлды уыд Дзæуджыхъæуы. Зæгъæм, уазджытæ базонгæ сты хæдзар-интернат «Аудынад» æмæ æндæр социалон кусæндæтты архайдимæ. Дыууæ республикæйы минæвæрттæ æрдзырдтой æмгуыстады фарстатыл, базонгæ сты кæрæдзийы куыстадон фæлтæрддзинадимæ. Уыимæ, дыууæ профилон министрады минæвæрттæ фæбæрæг кодтой ахадгæдæр иумæйаг проектты номхыгъд.
Дзæуджыхъæуккаг фембæлдтытæн фадæттæ сарæзта Сырх Дзуары дунеон комитеты минæварад Хуссар Ирыстоны. Минæварады разамонæг Саид Ассадулла фæстæдæр куыд фæбæрæг кодта, афтæмæй фембæлдтытæ зæрдæмæдзæугæ рауадысты. «Уæлдай дисы нæ бафтыдта, хæдзар-интернат «Аудынад»-ы фæкæсынхъуаг адæмæн цы зæрдæзæгъгæ уавæртæ ис, уый. Æз Сырх Дзуары комитеты дзæвгар рæстæг кусын æмæ ахæм социалон кусæндæтты бирæ хæттыты уыдтæн. Фæлæ дзæуджыхъæуккаг интернат куыд хæрззылд у, ахæмтæ бирæ нæ федтон. Уый тыххæй бузныг зæгъын æмбæлы «Аудынад»-ы директор æмæ æппæт коллективæн дæр», – йæ хъуыдытæ раргом кодта Саид Ассадулла.
Нæ уацхæссæг
