Мæскуыйы, Арбаты уынджы байгом Фыдыбæстæйы Стыр хæсты историимæ баст къамты равдыст. Экспозицийы кадджын бынат разынд нæ таурæгъон инæлар Плиты Иссæйы монументалон фæлгонцæн дæр.
Равдыст саразджытæ бацархайдтой, цæмæй иу фæзуатыл равæрой горæттæ-хъæбатырты, хæстон æмæ фæллойадон намысы горæтты хæстон историимæ баст номарæн æмæ зæрдылдарæн объектты къамтæ. Экспозицийы æдæппæт ис 31 къамы алы уæрæсейаг горæттæй. Уыдоны нымæцы – Мæскуы, Белгород, Астрахань, Волгоград, Брянск, Ярославль, Тулæ, Уфа, Севастополь, Дзæуджыхъæу æмæ иннæтæ. Дзæуджыхъæуккаг къамыл æвдыст цæуы Советон Цæдисы дыууæ хатты Хъæбатыр, æфсады инæлар Плиты Иссæйы цыртдзæвæн.
Равдысты алкæцы хуызджын ныв дæр у, советон адæм 1941-1945 азты
хæсты цы æгæрон хъæбатырдзинад æмæ Фыдыбæстæйыл иузæрдиондзинад равдыстой, уымæн ирд цæвиттон.
Мæскуыйы мэрийы куыд фехъусын кодтой, афтæмæй экспозици кусдзæн 31 июлы онг.
Нæ уацхæссæг
