Ирон национ культурæ йæхи ирдæй равдыста Витебскы аивæдты фестиваль «Славянаг базар»-ы, ноджы æнгомдæр сбаста Ирыстон æмæ Белоруссийы ‘хсæн хæлардзинады ахастдзинæдтæ.
Зындгонд оперон зарæггæнæг æмæ фестивалы жюрийы уæнг Амагæ Готти куыд радзырдта, уымæ гæсгæ мæскуыйаг «Алани» æмæ ирон зарджыты зæрдæмæхъаргæ азæлд белоруссаг кадджын сценæмæ дуæрттæ бакодтой æмæ фæндаг раттой бирæ ног ирыстойнаг курдиæттæн.
«Ахæм зæрдиагæй ныл сæмбæлдысты, æмæ диссаг. Витебскы аивадуарзджытæ тынг зæрдæхæлар разындысты. Нæ фæсивæдæй ахæм сæрыстыр уыдтæн, æмæ фырцинæй мæ цæстысыг бауромын нæ фæрæзтон. Мах-иу сценæмæ рацыдыстæм нæ Фыдыбæстæмæ стыр уарзондзинадимæ æмæ æппæт хъарутæй архайдтам уыцы уарзондзинад равдисыныл. Нæ паддзахадон тырысатæ нын куы рахастой – белоруссаг, уæрæсейаг æмæ ирон, уæд залы адæм сыстадысты, æмæ дæс минуты дæргъы тыхджын къухæмдзæгъд нал æнцад… Залы иунæг уæгъд бынат дæр нал уыд æрбадынмæ. Адæм хъæр кодтой: «Спасибо, Алания!» Уый мæнæн уыйбæрц æхсызгон уыд, раст цыма мæ бæллиц сæххæст, афтæ», – загъта Амагæ Готти.
Фестивалы фæлгæты мæскуыйаг «Алани»-йы коллектив æрбамбырд кодта курдиатджын фæсивæды Цæгат æмæ Хуссар Ирыстонæй. Уыдон фыццаг концерт раттой Витебскы бынæттон филармонийы, аивадуарзджыты базонгæ кодтой ирон культурæйы хъæздыгдзинадимæ.
Амагæ Готти концерты акодта ирон музыкæйы классикты уацмыстæ, Гæздæнты Булаты музыкæ æмæ Чеджемты Æхсары ныхæстыл фыст зарæг «О, куыд хорз у цард» æмæ ма зæрдæмæхъаргæ хуссарирыстойнаг Джыккайты Æхсар æмæ Галуанты Людмилæйы ныхæстыл фыст зарæг «Хризантемы».
«Мæскуыйы «Алани»-йы къорд егъау куыст бакодта, бирæ рæстæг сæхи цæттæ кодтой, цæмæй ахæм кадджын фестивалы архайой. Мæнæн уый стыр амонд у – ахæм зындгонд сценæмæ нæ курдиатджын артисттимæ иумæ рацæуын», – фæнысан кодта Амагæ Готти.
Уæлдай цымыдисаг та уыд хъазахъхъæгты рацыд сценæмæ. Уыдон акодтой,
Ирыстоны бирæ фæлтæртæн уарзон чи у, ахæм зындгонд ирон зарæг
«Уастырджи» æмæ ма æндæр зарджытæ дæр.
ГÆБУАТЫ Галинæ
