РЦИ-Аланийы Сæргълæууæг Сергей Меняйлойæн фембæлд уыд Скъоладзауты æппæтуæрæсеон олимпиадæйы цæгатирыстойнаг архайджытæ æмæ сæ хъомылгæнджытимæ.
Ацы аз æппæтуæрæсеон предметон олимпиадæты æнтыстджынæй архайдтой Цæгат Ирыстоны æртæ минæвары: Дзæуджыхъæуы 3-æм скъолайы 11-æм къласы ахуырдзау Сергей Бельский (историйæ), 5-æм гимназы 8-æм къласы ахуырдзау Илаты Артур (математикæйæ) æмæ уыцы гимназы 10-æм къласы
ахуырдзау Губаты Аидæ (биологийæ).
Сергей Меняйло фæсивæдæн зæрдиаг арфæ ракодта, æппæтуæрæсеон олимпиадæйы кæронбæттæны призертæ кæй систы, уый фæдыл. Арфæйы сæрмагонд
ныхæстæ загъдæуыд скъоладзауты ахуыргæнджытæ æмæ иннæ зондамонджыты номыл.
– Ахæм ахуырадон æппæтуæрæсеон ерыстæ алкæцы сывæллонæн дæр дæттынц йæ хъарутæ бавзарыны, йæ зонындзинæдтæ ирдæй равдисыны фадат. Æмæ нæ фæсивæд цас фылдæр архайа ахæм ерысты, цас æнтыстджындæр уой, уый пайдайаг уыдзæн æппæт респуб-ликæйæн дæр. Махæй, хистæртæй, цы аразгæ уа, ууыл дæр нæ бацауæрддзыстæм, цæмæй æрыгæтты æппæтвæрсыг æмæ бæстон ахуырадæн уа хъæугæ фадæттæ, – загъта Цæгат Ирыстоны разамонæг.
Сергей Меняйло йæ раныхасы сæрмагондæй фæбæрæг кодта, республикæйы Ахуырад æмæ наукæйы министрад курдиатджын фæсивæды хъарутæ раргом кæныныл куыд кусы, уый. 2022 азæй фæстæмæ Скъоладзауты æппæтуæрæсеон олимпиадæмæ цæттæдзинады фарстатыл комкоммæ бæрнон у сывæллæтты ахуырадон центр «Вершина». Уыцы æмæ иннæ ахуырадон кусæндæтты специалисттæ зæрдиаг
куыст кæнынц курдиатджын фæсивæдимæ.
Скъоладзауты æппæт-уæрæсеон предметон олимпиадæйы регионалон ерыстæ уыдысты мартъийы-апрелы. Ныр та уыд олимпиадæйы кæронбæттæн. Ерысы уæлахиздзау-тæн сæйрагдæр зæрдæлхæнæн свæййы сæхи равзæрст уæлдæр ахуыргæнæндонмæ бацæуыны бар.
Цæгат Ирыстоны Сæргълæууæг дæр æнæрхъуыдыйæ нæ ныууагъта предметон олимпиадæты æнтыстджындæр архайджыты. Афтæ, олимпиадæйы уæлахиздзаутæ æмæ сæ ахуыргæнджытæн нысангонд æрцыдысты премитæ 150 мин сомы бæрцæй, призертæн та – 100 мин сомы бæрцæй. Уыимæ, 3-æм скъолайы директор Хъæрджынты Таймураз æмæ уыцы скъолайы ахуыргæнæг Тыджыты Черменæн лæвæрд æрцыдысты РЦИ-Аланийы Сæргълæууæджы Арфæйы фыстæджытæ.
Сланты Аслан
