Фæндзайæм азты райдайæны Цæгат Ирыстоны радиокомитет расидт дикторы бынатмæ кусæг райсыны конкурс. Фæстæдæр куыд сбæрæг, афтæмæй фæлварæнтæ раттынмæ курдиæттæ балæвæрдтой æртиссæдз адæймаджы бæрц.
Уыдоны нымæцы уыдис Цæгат Ирыстоны паддзахадон педагогон институты филологон факультеты студент Адеты Никъалайы фырт Умар дæр, уыцы-иу рæстæг уый æххæст кодта Джызæлдоны районы фæскомцæдисы хайады сæргълæууæджы хæстæ. Суанг скъоладзау уæвгæйæ дæр Умар уæлдай фылдæр æргом здæхта йæ мадæлон æвзагмæ, ахуыр æй кодта зæрдиагæй, касти æмæ зыдта нæ зындгонд поэтты уацмыс-тæ, разæнгардæй архайдта алыхуызон литературон
изæрты. Тынг йæ зæрдæмæ цыдысты радиобакастытæ ирон æвзагыл, бæллыди дзы йæхæдæг дæр искуы архайынмæ.
Радиокомитеты дикторы конкурсы бæрæггæнæнтæм, бæгуыдæр, æнхъæлмæ касти æрыгон лæппу, кæд æй æмбæрста, нысан къухты æнцонæй нæ бафтдзæн, зæгъгæ, уæддæр. Рацыд иу мæй, æмæ дын иу бон Умар фыстæг куы райсид Дзæуджыхъæ-уæй. Уым ын хъусын кодтой, конкурсы уæлахиздзау кæй ссис, уый тыххæй. Йæ цинæн ма кæрон кæм уыди! Иуæй йæ бæллиц сæххæст, иннæмæй та, куыд базыдта, афтæмæй йын хъуамæ хорз мызд уыдаид йæ ног куысты.
Уыцы азты Джызæлдоны фæскомцæдисы райкомы фыццаг нымæрдарæй куыста Барахъты Ахболат. Умар æм дыккаг бон йæ фыстæгимæ цингæнгæ бахæццæ, радзырдта йын хабæрттæ.
Ахболат ын раарфæ кодта, загъта, æгайтма йын йæ курдиатæн ахæм стыр аргъ скодтой, уытæппæт адæмы ’хсæн фыццаг бынат бацахста. Æцæг, бафиппайдта Ахболат, районы разамындмæ æндæр нысантæ ис Умары тыххæй – сæ зæрды ис фæскомцæдисы райкоммæ йæ кусынмæ райсын, зондæй дæр æмæ ахуырæй дæр нымад у фæсивæды раззагдæр минæвæрттæн сæ иуыл. Æцæг, банхъæлмæ кæсын
хъæудзæн иуцасдæр рæс-тæг.
Ницыуал загъта Умар, нал ацыд радиокомитетмæ, æнхъæлмæ каст. Рацыд иу æртæ мæйы бæрц, æмæ уæдмæ лæппу æфсæддон комиссарадæй райста æфсады баслужбæ кæныны тыххæй гæххæтт.
Фыдыбæстæйы размæ бафыста йæ хæс, фæци æфсады рæнхъыты цыппар азы бæрц. Службæйы фæстæ пединституты филологон факультеты рауагъдон Адеты Умар кусын райдыдта ахуыргæнæгæй, фыццаг Уæллаг Санибайы авдазон скъолайы, уый фæстæ та йæ райгуырæн Джызæлы астæуккаг скъолайы, уыцы-иу рæстæг скъолайы чиныгдоны сæргълæууæгæй дæр.
Дæсгай азты дæргъы Умар цæстуарзонæй лæвар кодта йæ зонындзинæдтæ рæзгæ фæлтæрæн, разæнгардæй архайдта хъæубæсты, районы æхсæнадон царды, уыди хихъæппæрисадон къордты уæнг, газет «Рæстдзинад»-ы иузæрдион хæлар, арæх-иу рацыдысты мыхуыры йæ уацхъуыдтæ æгъдау, фæсивæды патриотон хъомылады, не ’хсæнады вазыгджын фарстаты тыххæй.
Умар йæ бинойнаг Дауыраты Барысбийы чызг Римæимæ схъомыл кодтой хорз цот, дыууæ чызджы – Людмилæ æмæ Иринæйы æмæ дыууæ лæппуйы –
Сослан æмæ Русланы.
Суанг йæ царды фæстаг бонты онг дæр Умар нæ рох кодта, радиойы дикторы бынатмæ конкурсы куыд фæуæлахиз, куыд тынг бæллыд уырдæм бацæуынмæ, фæлæ, куыд фæзæгъынц, цардæн йæхи æгъдæуттæ æмæ фæтк ис. Афтæ уыди æмæ уыдзæн кæддæриддæр…
Хæмыцаты Морис
