Цæгат Ирыстоны йæ куыст кæны, иннæты ‘хсæн уæлдай бæрæг чи дары, курчатоваг ахæм сменæ. Хъуыддаг æххæстгонд цæуы Æрыгæттæ æмæ сывæллæттæн сæ курдиæттæ раргом кæнын æмæ сын баххуыс кæныны центры, «Фæсивæд æмæ сывæллæттæ», зæгъгæ, ацы национ проекты фæлгæты.
Амынд программæйы нысан у 7-8-къласонтæн сæ наукон хъомыс æмæ сфæлдыстадон фæлтæрд-дзинад раргом кæнын, наукæ æмæ наукон технологитæм æрыгæттæ æмхицдæр цæмæй кæной, уый тыххæй.
Æвдæмкъласонтæ кусынц ахæм темæйыл «Химия и цвет». Сæ разамонджытæ сты Хетæгкаты Къостайы номыл Цæгат Ирыстоны паддзахадон университеты ахуыргæнджытæ æмæ студенттæ. Скъоладзаутæ ахуыр кæнынц химион реакцитæ, буаргъæдты миниуджытæ æмæ оптикон фæзындтытæ. Уыдоны фæрцы химион процесстæ вæййынц цæстуынгæ æмæ сын ис æнцондæрæй бамбарæн. Ахæм практикон ахуырты фæрцы скъоладзаутæ зонгæ кæнынц канд теориимæ нæ, фæлæ, химион процесстæй царды цы хуызы ис пайдагæнæн, уыимæ дæр.
Æстæмкъласонтæ та компьютерон программæты фæрцы ноджы бæстондæрæй зонгæ кæнынц физикон процесстимæ. Уыцы ахуырты сын æххуыс кæнынц «Курчатоваг институты» Национ-иртасæн центры специалисттæ. Ахуырты архайджытæ базонынц нымæцон хуызæгтæ аразыны нырыккон фæрæзтæ. Уый сын фадат дæтты раззагдæр технологон зонындзинæдтимæ зонгæ кæнын æмæ сæ зонындзинæдтæ парахатдæр кæнын. Афтæмæй сæ уыцы хуызы цæттæ кæнынц наукон къабазы сæ фидæны архайдимæ.
Иу къуыримæ скъоладзаутæ канд сæ зонындзинæдтæ нæ фæфылдæр кæнынц, фæлæ ма сæ алчидæр саразы наукон проект. Стæй йын аргъ скæныны тыххæй йæ бавдисынц жюрийы уæнгтæн. Уый у ахуырты ахсджиаг къæпхæн æмæ сын дæтты сæхи равдисыны фадат, стæй сæм æвзæрын кæны наукон иртасæнтæ адарддæр кæныны фæндон.
РЦИ-Аланийы Ахуырад æмæ наукæйы министрады пресс-службæ
