Гæналдоны комы Хъолайы цъити 2002 азы куы раивылд, уæдæй йæм специалисттæ æппынæдзух сæ цæст дарынц. Комы 2004 азы сæвæрдтой гидрометеорологон хъуыддæгтæм цæстдарыны автоматикон фæрæзтæ. Фæлæ, цъитийы цы змæлд цæуы, уый æмхуызонæй нæ бон раиртасын нæу.
Тæссаг геологон змæлдтытæй бахизыны тыххæй ахуыргæндты æмæ специалистты бахъæудзæн бæлвырд бæрæггæнæнтæ æвдисæг фæрæзтыл бакусын. Хæххон-металлургон институты «Хæххон хъуыддаг»-ы кафедрæйы разамонæг, профессор Гæбæраты Олег куыд зæгъы, афтæмæй ныртæккæ пайда кæнын хъæуы спутникты технологитæй.
«О, ныртæккæ Хъолайы цъитимæ цæст дарæм, фæлæ уыдæттæ конд цæуынц бауайгæйæ, тагъд-тагъд. Аэрокосмосон æмæ хъармы фæрæзты фæрцы цъитийы къамтæ исæм, йæ уавæрмæ кæсæм. Доны бæрц æвзарæм, цъитийы уæлцъармæ кæсæм, зæгъæм, сейсмостанцæйы раз æвæрд GPS-фæрцы. Фæлæ, мæнмæ гæсгæ, газ æмæ гидрологон цæстдарды афон ралæууыд, хъуамæ цъитийы уæлцъармæ æппынæдзух кæсæм. Уый тыххæй та хъуамæ цæстдарæн станцæ сифтонг кæнæм, цæмæй æнæмæнг кæнгæ мадзæлттæ дæр саразæм, адæмæн дæр афойнадыл тæссаг уавæры тыххæй фехъусын кæнæм. Цъитийы уæлцъармæ хъуамæ æнæмæнг цæст дарæм, адæмы дæр дзæгъæлы тæрсын кæнын нæ хъæуы», – загъта Гæбæрайы-фырт.
Хъолайы цъити æрбынæттон Гæналдоны комы, Хъазыбег-Джимарайы хæххон басты, хауы æппынæдзух змæлæг цъититæм. Уыдон бæрæг дарынц змæлдæй, фидардзинад сæм нæй. Фæстаг хатт Хъолайы цъити раивылд 2002 азы сентябры. Стыр бæллæхтæ æрхаста нæ адæмæн.
Кучиты Алыксандр
