Сентябры Дзæуджыхъæуы байгом уыдзæн ног ахуырадон кусæндон – Креативон индустриты скъола. Уый æрбынæттон уыдзæн Аивæдты республикон лицейы бæстыхайы.
Уый тыххæй «Рæстдзинад»-æн фехъусын кодтой РЦИ-Аланийы Культурæйы министрады пресс-службæйы.
Ног скъолайы ахуырадон программæтæ арæзт уыдзысты дыууæ азы æмгъуыдмæ. Фæлтæрдджын ахуыргæнджытæ æмæ иннæ специалистты разамындæй скъоладзаутæн лæвар ахуыртæ уыдзæн дизайны, звукорежиссурæйы, музыкæйы, къамтæ исын æмæ кинойы аивады студиты. Скъолайы хъомылгæнинаг суæвыны фадат уыдзæн 5-11-æм кълæсты ахуырдзау лæппутæ æмæ чызджытæн.
Креативон индустриты скъолайæн цы бæстыхай радих кодтой, уым ныртæккæ кæронмæ фæхæццæ кæнынц цалцæггæнæн куыстытæ. Культурæйы министрады бæрнон кусджытæ сæ цæст дарынц куыстыты фæткмæ.
«Цæгат Ирыстоны фыццаг ахæм ахуырадон кусæндон кæй байгом уыдзæн, уый æз нымайын вазыгджын цауыл. Уый фæрцы нæ фæсивæдæн фæзындзæн, сæ хъарутæ æмæ курдиат кæм бавзарой, ахæм ног гæнæнтæ. Зындгонд æмæ фæлтæрдджын зондамонджыты семинартæ, мастер-класстæ æмæ лекцитæ æвзонг, сфæлдыстадмæ æмхиц лæппутæ æмæ чызджытæн, æнæмæнг, суыдзысты, аивады тыгъдадмæ сæ фæндаг кæмæй райдайдзæн, ахæм ахсджиаг къæпхæн. Мæ зæрдæ дарын, ног скъолайы рауагъдонтæ фидæны Цæгат Ирыстоны культурæйы къабазы дарддæры райрæзтмæ се ’вæрæн кæй хæсдзысты, ууыл», – цæттæгæнæн куыстытæн хатдзæгтæ кæнгæйæ, бафиппайдта республикæйы культурæйы министры хæстæ рæстæгмæ æххæстгæнæг Рæмонты Маринæ.
Культурæйы министрады пресс-службæйы куыд фæбæрæг кодтой, афтæмæй ног скъолайы ахуырдзау суæвыны тыххæй курдиæттæ бадæттæн ис 23 августы онг Аивæдты лицейы официалон сайты фæрцы.
Уый – Креативон индустриты фыццаг скъолаимæ баст хабæрттæ. Уыимæ, Культурæйы
министрады куыд радзырдтой, афтæмæй дыккаг ахæм ахуырадон тыгъдад байгом кæндзысты 2026 азы Тауаситы Сослæнбеджы номыл аивадон скъолайы бæстыхайы.
КАЛМАНТЫ Аслан
