Мæскуыйы кусæг балцы уæвгæйæ, Цæгат Ирыстоны Сæргълæууæг Сергей МЕНЯЙЛОЙÆН фембæлд уыд Уæрæсейы Фæдерацийы Хицауады Сæрдары хæдивæг Дмитрий ПАТРУШЕВИМÆ. Ныхасы сæйрагдæр фарстатæ уыдысты регионы агропромышленнон комплексы дарддæры райрæзт æмæ экологон фæрныгады фарстатæ.
Абоны уавæр æмæ рæзты нысантыл дзургæйæ, Сергей Меняйло куыд фæбæрæг кодта, афтæмæй аграрон къабаз зынгæ бынат ахсы республикæйы иумæйаг экономикон архайды. Йæ ныхасмæ гæсгæ, Цæгат Ирыстоны хъæууонхæдзарадон куыстады индекс, рæстæмбис æппæтуæрæсеон бæрæггæнæнтимæ абаргæйæ, у бæрзонддæр. Ивгъуыд аз æмæ фæстаг æхсæз мæйы куыстæн хатдзæгтæ æвдисынц, фосдарынад æмæ æхсыры æрдыгъды бæрæггæнæнтæ кæй рæзынц, уый.
Ирыстоны азæй-азмæ фылдæр кæны зæхкусæг-фермерон хæдзарæдты нымæц, агропромышленнон комплексы къабазы рæзы чысыл æмæ рæстæмбис амалхъомады субъектты нымæц. Регионы Хицауад æппæт фадæттæй архайы хъæууонхæдзарадон куыстады дарддæры райрæзтыл, фадæттæ арæзт цæуы къабазы кусæндæтты модернизацийæн, хæдзарæдтæ техникон æгъдауæй хъомысджындæр кæнынц. Уыимæ, сæрмагонд æргом здæхт цæуы хъæууон цæрæн бынæтты фæлгонцадмæ дæр.
Экологон фарстатæм рахизгæйæ, фембæлды архайджытæ хатдзæгтæ скодтой, фыццаградон национ проект «Экологи»-йы фæлгæты фæстаг азты дæргъы республикæйы цы мадзæлттæ арæзт æрцыд, уыдонæн. Куыд загъдæуыд, афтæмæй ахадгæ куыст цыд æнæза-къон бырондæттæ аиуварс кæныныл, цæугæдæтты санитарон сыгъдæгдзинадыл, хъæды фæзуæттæ фæфылдæр кæныныл, экологон фæрныгадимæ баст æндæр вазыгджын фарстатыл. Æппæт уыцы куыстытæн 6 азмæ федералон бюджетæй регионæн дихгонд æрцыд 4 миллиард сомы бæрц. Уыимæ, æппæт уыцы фарстатыл куыст адарддæр уыдзæн хæстæгдæр фидæны дæр ног национ проект «Экологон фæрныгад»-ы фæлгæты.
Дмитрий Патрушев æмæ Сергей Меняйло фæбæлвырд кодтой, хæстæгдæр азты цы райрæзты проекттæ æмæ программæтыл куыст цæудзæн, уыдоны номхыгъд.
РЦИ-Аланийы Сæргълæууæг æмæ Хицауады пресс-службæ
