Ныййарæджы капиталæй пайда кæныны тыххæй курдиæттæ æвзарыны æмгъуыдтæ фæкъаддæр сты дыууæ хатты. Республикæйы социалон фонды хайад хъæугæ гæххæттытæ райсыны бонæй курдиат æвзæрст æрцæуы 10 боны бæсты ныртæккæ 5 боны æмгъуыдмæ. Уый цæгатирыстойнаг бинонтæн фадат дæтты паддзахадон æххуысæй тагъддæр спайда кæнынæн æмæ ныййарæджы капитал фыццаградон хъуыддæгтæ лыг кæнынмæ бавналынæн.
Курдиæттимæ бадæтгæ гæххæттытæ-иу æххæст кæй нæ уыдысты, уый тыххæй сæм раздæр кæд каст цыд 20 боны дæргъы, уæд ныр уыцы æмгъуыд фæцыбыр кодтой 12 боны онг.
– Уæрæсейы Социалон фонды РЦИ-Аланийы хайад ныййарæджы капитал æрцæттæ кæны сывæллоны райгуырдæн йæ уæлвæд, ныййарджытæй ницавæр курдиат æмæ хъæугæ гæххæттытæ æрдомгæйæ. Сывæллон ЗАГС-ы оргæнты регистрацигонд куы æрцæуы, уæд уый фæстæ паддзахадон лæггæдты мады хи кабинетмæ уайтагъд бацæуы ныййарæджы капиталы сертификат, – загъта хайады разамонæг
Милдзыхты Аслан.
Ныййарæджы капиталы фæрæзтæй спайда кæнæн ис цæрæнуæтты уавæртæ фæхуыздæр кæнынæн, сывæллæтты ахуырæн, æртæаздзыд сывæллæтты æрвылмæйон фиддонтæн, пенси æмбырд кæнынæн, инвалид сывæллæтты социалон уавæр нывыл кæнынæн.
Сывæллоны райгуырды фæстæ йæ уæлвæд ныййарæджы капиталæй спайда кæнæн ис ипотекæ бафидынæн кæнæ цæрæнуаты кредиты фыццаг бахаст бафидынæн, бинонты кæцыфæнды сывæллонæн скъолайы агъоммæйы æрвылмæйон фиддонтæн. Æндæр уавæрты фæрæзтæй пайдагæнæн ис, сывæллонæн йæ райгуырды бон цы сæртификат лæвæрд æрцыд, уымæй æртæ азы йыл сæххæсты фæстæ.
Ныййарæджы капиталæй пайда кæныны тыххæй курдиат бадæттæн ис паддзахады лæггæдтæм, Социалон фонды республикон хайады клиентты службæ кæнæ МФЦ-мæ.
Уынаффæ рахæссынæн иннæ уæлæмхасæн хъæугæ гæххæттытæ æмæ зонæнтæ ист æрцæудзысты ведомствæты ’хсæн архайдæй, ныййарджыты архайд дзы нæ хъæуы.
Цæгат Ирыстоны 2025 азы райдайæнæй фæстæмæ ныййарæджы капиталы сертификаттæ райстой 1,5 мин бинонтæ. Сæ цæрæнуæтты уавæртæ фæхуыздæр кæнынæн фæрæзтæй спайда кодтой республикæйы 700 бинонтæ, сывæллæтты ахуырæн – 450 сертификаты хицауы.
Æрвылмæй ныййарæджы капиталы фæрæзтæй сывæллоны фæцæрыны æппынкъаддæр мызд (15481 сомы) райсынц 1167 бинонтæ.
Ныййарæджы капиталæй спайда кæныны фæстæ ма хыгъды 10 минæй къаддæр куы баззайа, уæд сæ бинонтæн сæ бон райсын у уыцы иуæй.
Уæрæсейы Социалон фонды Цæгат Ирыстоны хайады пресс-службæ
