Æрæджы Ростовы облæсты Неклиновскы районы йæ куыст фæци литературон XIII Национ культурæты æхсæнадæмон фестиваль æмæ Леонид Северы номыл Х поэзи æмæ поэтикон тæлмацты æхсæнадæмон фæсивæдон фестиваль-конкурс «Берега дружбы».
Ацы аз фестивалы координацион советмæ æрцыд лæвæрд 250 заявкæйы, архайдтой дзы æрыгон литератортæ æмæ сæ разамонджытæ Уæрæсейы 54 регионæй, уыимæ – 18 националон-автономон фæзуатæй, Донецк æмæ Луганскы Адæмон республикæтæй, Запорожьейы облæстæй, стæй Республикæ Беларусæй. Заявкæтæ балæвæрдтой поэттæ Казахстан, Израиль, Киргизи, Сомих, Польшæ æмæ Канадæйæ.
Фестивалы æрвылаз фæархайы Хъæбæлоты Билары номыл Сывæллæтты республикон сфæлдыстадон галуаны минæвæрттæ – сфæлдыстадон иугонд «Талатæ», йæ разамонæг – Танделаты Розæ. Дæс азы дæргъы Танделон йæ хъомылгæнинæгтимæ ацæуы Ростовы облæстмæ, сабиты конд алыхуызон дзаумæттæ, предметтæ æвæрд æрцæуынц æрмдæсныты куыстыты равдысты, æмæ сын стыр аргъ скæнынц жюрийы уæнгтæ, фестивалы архайджытæ. Æхсызгон та куыд нæ вæййы иу азæй иннæмæ, Ростовмæ æрцæугæйæ, сæ къухæй конд нымæтын гауызтæ, дурæй амад мæсгуытæ, хæххон царды нывтæ библиотекæйы зынгæ ран æвæрдæй куы фенынц, уæд. Семæ цы ног конд лæвар æрласынц, уый дæр уым сæрмагонд бынат æрцахсы.
Æдасдзинады уавæртæ хынцгæйæ, ацы аз Танделаты Розæ фестивальмæ ацыд иунæгæй, равдыстмæ аласта йæ хъомылгæнинæгты куыстытæ, Леонид Северы номыл библиотекæйæн та балæвар кодта, сывæллæттæ зæрдиагæй кæуыл бацархайдтой, уыцы мæсыг…
Фестивалы бирæ алыхуызон мадзæлттæ арæзт æрцыд – автортæ сæхæдæг кæй балæвар кодтой, стæй славянаг æмæ Доны авторты къухфыстытæ æмæ чингуыты равдыстытæ, мастер-къластæ интерактивон фæзты, «фито-кафе», рагон царды къухæй арæзт цымыдисаг дзаумæттæ æмæ афтæ дарддæр.
Фестивалы бындурæвæрæг уыд поэт Леонид Север, хъыгагæн, фарон йæ зæххон цард фæци, фæлæ йæ хъуыддаг цæры! Йæ ном ын сæнусон кодтой – Новобессергеневскаяйы хъæууон библиотекæ æмæ фестивалæн æй ратгæйæ. Хъæуы алы фæзты азæлыдысты йе ‘мдзæвгæтæ, сæ сæйраг темæ – Фыдыбæстæйы Стыр хæст.
Бæрæгбоны архайджытыл æхсызгонæй сæмбæлдысты бынæттон цæрджытæ, бацæттæ сын кодтой хъæздыг концертон программæ дæр, архайдтой дзы хуыздæр аивадон коллективтæ.
Фестиваль-конкурсты сбæрæг сты уæлахиздзаутæ, лауреаттæ, хуыздæртæй хуыздæртæ. Танделаты Розæ æмæ сфæлдыстадон къорды уæнгтæ дæр рохуаты нæ баззадысты – «Талаты» разамонæг Ирыстонмæ ссыди дыууæ кады гæххæттимæ, иудадзыг активонæй фестиваль-конкурсы кæй архайынц, адæмты ‘хсæн хæлардзинад кæй фидар кæнынц, сфæлдыстадон куыстмæ стыр æргом кæй здахынц, уый тыххæй.
Танделонмæ бирæ пълантæ ис, газеты хæстæгдæр номыртæй иуы ныхас цæудзæн, рох кæнын кæй райдыдтам, уыцы рагон æрмдæсныдзинады куыстытæ сног кæнынæн цавæр мадзæлттæ ссардта, уый тыххæй.
ГАПБАТЫ Алетæ
