Азæлыдысты Уæрæсейы Федераци æмæ Республикæ Цæгат Ирыстон-Аланийы паддзахадон гимнтæ. Нæ республикæйы йæ тыхы бацыд ахуырадон программæ «Æхсарджын Ирыстон». Программæ æххæстгонд цæуы УФ-йы Президент Владимир Путины уынаффæйæ, федералон проект «Хъæбатырты рæстæг»-ы фæлгæты.
Проекты архайджытæн арфæ ракодтой (видео-бастдзинады фæрцы) республикæйы Сæргълæууæг Сергей Меняйло, РЦИ-Аланийы Хицауады Сæрдар Дзанайты Барис, республикæйы фæллой æмæ социалон рæзты министр, Уæрæсейы Хъæбатыр Абайты Юри æмæ Президентон академийы паддзахадон разамынды уæлдæр скъолайы директор Олег Кондратенко.
– Зынаргъ æмбæлттæ, проект «Æхсарджын Ирыстон»-ы архайджытæ! Мах нæ кæрæдзийы хорз зонæм, уымæн æмæ иу хъуыддаг æххæст кæнæм. Мæн уырны, уæ къухы алцыдæр кæй бафтдзæн. Нæ сæйрагдæр нысан у сæрмагонд æфсæддон операцийы архайджытæн куысты бынæттæ ссарын, цæмæй, цы зонындзинæдтæ райсат, уыдон Ирыстон æмæ нæ бæстæйы хорздзинадæн фæпайда уой! Æнтыстджын æмæ уæлахиз ут!, – загъта Сергей Меняйло.
Æдæппæтæй проекты архайынмæ сæ курдиæттæ балæвæрдтой 385 адæймаджы. Уыдон сты сæрмагонд æфсæддон операцийы архайджытæ æмæ йæ ветерантæ. Уыдоны ’хсæн равзæрстой 157 архайæджы. Дарддæр æхсæнадон советы уæнгтæ æркастысты кандидаты бахæссын республикон ахуырадон программæ «Æхсарджын Ирыстон»-мæ. Хъæлæскæныны бæрæггæнæнтæм гæсгæ, уыдонæй 32 систы кæронбæттæны уæлахиздзаутæ æмæ архайдзысты комплексон ахуырадон программæйы. Се ’ппæтмæ дæр ис уæлдæр ахуырад æмæ сты Цæгат Ирыстоны цæрджытæ.
Программæ арæзт цæуы Президентон академийы паддзахадон разамынды уæлдæр скъолайы æххуысæй – йæ минæварад ис нæ регионы. Программæ «Æхсарджын Ирыстон» цы кусæг къорд бацæттæ кодта, уыдон ацыдысты ахуыртæ æмæ базыдтой, ахæм программæтæ куыд аразгæ сты, уый.
Курсы фæлгæты нысангонд æрцыдысты ахуырады сæйрагдæр къабæзтæ: паддзахадон политикæ æмæ паддзахадон разамынды системæ; экономикæ æмæ финанстæ; регионалон æмæ муниципалон разамынд; разамынды нырыккон технологитæ.
Ахуырадон программæ у хъæздыг æмæ алывæрсыг: стажировкæтæ, дæрддзæф курсытæ, адæймаджы рæзты мадзæлттæ æмæ культурон хъæппæристæ.
Иу хатт ма уын уæ зæрдыл лæууын кæнæм, республикон паддзахадон программæ «Æхсарджын Ирыстон» арæзт у, сæрмагонд æфсæддон операцийы архайджытæ æмæ ветерантæй бæрзонд цæттæдзинады æмæ хъуыддагзонæг разамонджытæ цæттæ кæнынæн. Йæ нысан у ног разамонджытæ бацæттæ кæнын, цæмæй сæ бон кусын уа паддзахадон хицаудзинады оргæнты, алыхуызон организацитæ æмæ регионы æхсæнадон иугæндты.
ХЪОЙБАЙТЫ Галинæ
