Ног ахуыры азæй Цхинвалы Æвзонг техникты станцæйы скусдзæн ног сфæлдыстадон проект – дурынгæнæн къорд. Уый фехъусын кодта станцæйы разамонæг Къалаты Нариман. Куыд æмбарын кæны, афтæмæй керамикон æрмадз байгом кæнын бантыст кадрты фарста алыггæнгæйæ æмæ хъæугæ ифтонггæрзтæ балхæныны фæстæ.
Керамикон къорд саразыны хъуыды раджы фæзынд, Уæрæсейы хуссары дурынтæ кæныны хъуыддаг йæ тыхы бацыд. Афтæ зæгъæн ис, æмæ уый у æнцон архайд, æдас сфæлдыстад. Пайда дзы кæнынц ахуырад æмæ реабилитацийы нысанты. «Керамикæйы архайд уæлдай ифтонггæрзтæ нæ домы, фæлæ йæ психологион æмæ сфæлдыстадон ахадындзинад бæрзонд у. Сывæллæттæ сæм афтæ æхсызгонæй уымæн цæуынц, æлыгимæ куыст сын куы фæамонæм, уæд сцыбæл вæййынц. Уæрæсейы фæзындысты алыхуызон ахуырадон программæтæ», – фæбæрæг кодта Къалайы-фырт.
Хуссар Ирыстоны керамикон аивад раздæр амыдтой Аивадон училищæйы, фæлæ хæстон цаутæ фæстæ хъуыддаг ныссыкк. Сног æй кæнын не ‘нтыст, нæ уыд хорз цæттæгонд ахуыргæнæг, уæдæ æлыгæй конд дзаумайæн, æнæмæнг, хъæуы пец. Уыдон уыдысты сæйраг къуылымпытæ.
«Дурынтæ кæныны сæйрагдæр ифтонггарз у пец. Кæцыдæр дзаумайæн йæ аргъ вæййы 800 мин сомы, милуанмæ дæр схæццæ вæййы. Махæн нæ къухы бафтыд пец 100 мин сомæй райсын. Æхцайы иу хай раттой Ахуырады министрадæй, иннæ хай та – республикæйы Президенты Администрацийы разамонæг Æлборты Алан ратта», – загъта станцæйы хицау. Ацы пецы бавæрæн уыдзæн æлыгæй конд дзаума 40 сантимерты бæрзæндæй. Уый уал куыстæн хорз ахъаз фæуыдзæн. Педагог дæр ссардтой, Цхинвалы цæры, Дзæуджыхъæуы колледжы керамикон хайад чи фæцис, ахæм чызг.
Къалаты Нариман куыд амоны, афтæмæй æлыгæй куыст психологион æгъдауæй хорз ахады рæзгæ сывæллоныл. Хи къухтæй кæй скæнай, уый психикæйæн ахъаз дæтты. Зæгъæм, хæдæрмæгимæ, æлыгимæ кусгæйæ, зынгæ фæкъаддæр вæййынц сабийы алыхуызон тæссаг фæзындтæ, сывæллоны зонд хуыздæр кусы. Афтæ зæгъæн ис, æмæ сæ хъуыдыкæнынад рæзы, парахатдæр кæны.
Æвзонг техникты станцæйы техникон рахацæнтæ дарддæр рæздзысты. Нырмæ уал кусы дронтæ уадзыны къорд, сывæллæттæ сæ хайгай халынц, æмбырд кæнынц, тæхынæй сæ фæлварынц. Рæхджы йæ куыст райдайдзæн кванториум дæр. Ныртæккæ йыл куыст цæуы. Хуссарирыстойнаг ахуырады ведомствæйæн æмгуыстад ис уæрæсейаг минæвæрттимæ. Хъуамæ фæкæсой ифтонггæрзтæй, уæд станцæйы фæзындзысты информацион технологиты къордтæ, робототехникæ, программæтæ аразыны фæрæзтæ.
Ныртæккæ Æвзонг техникты станцæ кусы Дзæуджыхъæуы кванториутимæ. Сывæллæттæн ахсджиаг сты, сæ архайды хатдзæгтæ сæ бон фенын кæм у, ахæм сфæлдыстадон къордтæ, фæнды сæ хъæдæрмæгимæ, æлыгимæ, ахæм æрмæджытимæ кусын. Станцæйы кусджытæ рацыдысты сæ фæлладуагъдæй, бавнæлдтой сывæллæтты ног къордтæм фыссынмæ. Станцæ æрлæууыд рæзты ног къæпхæныл.
Тедеты Аннæ
