Дзæуджыхъæуы А.С. Пушкины номыл музейы цæгаткавказаг дæлхайады байгом æрыгон нывгæнæг Ася Заславскаяйы равдыст – социокультурон проект «Царды миниуджытæ» («Признаки жизни»).
Ася райгуырд Мæскуыйы, фæлæ йæ аивадон æвзаг, куыд нывгæнæг, раргом Цæгат Кавказы. Чызгыл æстдæс азы куы цыд, уæд архайдта Дзæуджыхъæуы программæ ART Кавказ Next-ы, фыццаг хатт йе ‘ргом аздæхта химбарынад, традицитæ æмæ зæрдылдарыны темæтæм. Йæ фыццаг проекттæ сарæзта Цæгат Ирыстоны фестиваль «Аланикæ»-йы фæлгæты. Нæ республикæйы сæйраг горæты Ася Заславскаяйы равдыстæн ис йæ аивадон райгуырæн бæстæ æмæ йе сфæлдыстады бындуры æвæрд фарстатæм раздæхыны нысаниуæг.
Равдысты проект арæзт у нывгæнæджы лейтмотивтæй иуы æмбарынадмæ. Йæ аивады Ася аразы ахæм уавæртæ, æмæ дзы, чи йæм æрбацæуа, уый хъуамæ бамбара: нывгæнæг цы сфæлдыста, уым кæддæр уыдис цард – адæймаг кæм цард, кæм уарзта, диссæгтæ кæм арæзта æмæ кæцæй фесæфт.
Цæст цы уыны, уымæй нæ дуне тынг хъæздыг у, фæлæ Ася Заславскаяйы равдыстмæ æрбацæуджытæ сæхицæн райгом кæндзысты бынтон æндæрхуызон дуне – нæй дзы формæ, фæлæ дзы ссардзæн, адæймаг йæ фæстæ кæй ныууадзы, ахæм мысинæгтæ. Нывгæнæджы алы куысты дæр ис, чи ацыд æмæ чи баззад, ома мах, уыдонимæ бастдзинад, сæ фæд нæ царды. Уыцы тыгъдад дзурæг у, фæд æнæмæнг кæй баззайы, æбæрæгæй кæй ничи æмæ ницы фесæфы.
МАГКАТЫ Стеллæ,
Михайловскы скъолайы ахуыргæнæг
