Зындгонд куыд у, афтæмæй 2025 азы 14 сентябры уыдзæн Хъæлæс кæныны æппæтуæрæсеон бон. Цæгат Ирыстоны фыццаг хатт пайдагонд æрцæудзæн дæрддзæгмæ фæткыл электронон хъæлæскæнынадæй.
Ахæм фадатæй спайда кæнæн уыдзæн 13 æмæ 14 сентябры. Уыцы бонты æвзæрст
цæудзысты республикæйы фондз хъæууон районы бынæттон хиуынаффæйады оргæнтæ.
Специалисттæ куыд зæгъынц, афтæмæй онлайн хъæлæскæнынады фæрцы бирæ æнцондæрæй сæххæст кæнæн ис граждайнаг хæс. Фыццаджы-фыцагдæр, уымæн, æмæ ныр æвзарæн участокмæ цæуын нал бахъæудзæн, хъæлæс раттæн ис, компьютер кæнæ смартфонæй спайда кæнгæйæ. Ахæм æууæл уæлдай ахсджиагдæр у, куысты лæуд чи у, кæнæ балцы чи ис, уыцы адæмæн. Иннæмæй та, ис, участокмæ бацæуын зын кæмæн уыдзæн, ахæм сахъат кæнæ ацæргæ адæм дæр. Уыдон ныр æдыхстæй архайдзысты хъæлæскæнынады.
Экспертты хатдзæгмæ гæсгæ, электронон æвзарæн системæ у æдас, хъахъхъæд у алыхуызон æнæзакъонæй ныхилыны фæлтæрæнтæй.
Дæрддзæгмæ фæткыл электронон хъæлæскæнынады архайыны фадат ис æвзарджытæй алкæмæндæр. Хъæуы æрмæстдæр паддзахадон лæггæдты порталы (дæлхайад «Мои выборы»-йы) фæрцы рагацау курдиат бæдæттын…
Республикæйы Æвзарæн къамисы «Рæстдзинад»-æн куыд радзырдтой, афтæмæй ахæм курдиат бадæттæн ис 9 сентябры онг. Фæстаг бæрæггæнæнтæм гæсгæ, дæрддзæгмæ хъæлæс кæныны фæдыл абоны онг курдиæттæ балæвæрдтой 1,3 мин адæймагæй фылдæр.
Кæй зæгъын æй хъæуы, дæрддзæгмæ электронон хъæлæскæнынады фæтк ма иу къахдзæф у нырыккон æвзæрстытæм. Уæдæ, бакæсæм, бавзарæм уый дæр…
Дмитрий АСТАХОВ
